650 exiting 4Ps nakabenepisyo sa information

ug service caravan sa lungsod sa Pilar

TAGBILARAN CITY, Bohol (PIA)--Nikabat sa 650 ka mga transitioning/exiting Pantawid Pamilyang Pilipino Program (4Ps) households ang nakapahimulos sa nagkalain-laing serbisyo sa gobyerno, impormasyon ug oportunidad sa gipahigayong caravan sa Pilar Cultural and Sports Complex sa lungsod sa Pilar niadtong Nobyembre 20, 2025.

Gipasiugdahan sa Association of United Development Information Officers (AUDIO)-Bohol, sa pakigtambayayong sa Department of Social Welfare and Development (DSWD) ug Department of Agriculture (DA), gipahigayon ang information ug service caravan nga gitawag og "Panagtagbo Alang Sa Paglambo sa Pamilyang 4Ps."

Ang maong kalihokan nagtumong sa pagdala sa mga serbisyo sa gobyerno, paghatag og impormasyon ug mga oportunidad nga mas duol sa mga transitioning/exiting 4Ps households tungod sa 7-year limit gikan sa mga lungsod sa Pilar, Sierra Bullones, San Miguel ug Alicia.

Ang mga serbisyo nga napahimoslan sa mga 4Ps naglakip sa pag-issue og ID ug MDR updating/printing sa PhilHealth; Philippine Statistics Authority (PSA) PhilID registration; membership/data updating sa Pag-IBIG Fund ug libreng tupi sa 47th Infantry Battalion (47IB) sa Philippine Army.

Samtang nanghatag og adbokasiya nga mga materyales ug nitubag sa mga pangutana kalabot sa ilang mga programa ang DSWD, DA, Philippine Coconut Authority (PCA), Department of Education (DepEd), Department of Environment and Natural Resources (DENR), Technical Education and Skills Development Authority (TESDA), Agricultural Training Institute (ATI) Central Visayas ug ang Philippine Information Agency (PIA).

Ang Department of Information and Communications Technology (DICT) sa pagpanguna sa ilang agency head Victor Magallanes, naghatag og satellite internet connectivity aron makahatag og serbisyo ang ubang mga ahensya.

Samtang ang bahan sa Philippine Carabao Center-Ubay Stock Farm nipahigayon og libreng konsultasyon uban sa ilang Veterinarian alang sa mga baka ug kabaw, nanghatag og vitamin supplementation, deworming, pregnancy diagnosis sa mga baka ug kabaw ug Al sa mga mag-uuma sa Poblacion Pilar ug silingang mga barangay.

Nisuporta usab sa maong kalihokan ang Provincial Government of Bohol pinaagi sa ilang Education Development Center (EDC) sa pangpanghatag og school bags ug school supplies sa 104 ka mga estudyante sa Grade 1 ug 2 ug pagpadala og representante sa Office of the Provincial Social Welfare and Development (OPSWD) nga mitubag sa mga pangutana sa mga 4Ps.

Ang DepEd mipaambit nga sa programa sa DSWD Pantawid, misaka ang partisipasyon sa eskwelahan ug mikunhod ang school dropout. Ang mga awtoridad sa ahensya pinangulohan ni Schools District Supervisor Daisy Orcullo, nanawagan sa Out of School Youth (OSY) nga mo-avail sa Alternative Learning System (ALS) aron makahabol ug mahimong produktibo.

Samtang ang PhilHealth, pinaagi sa Local Health Insurance Office Chief niini nga si Maria Theresa Abella, nag-awhag sa mga migraduwar sa 4Ps nga magparehistro sa super eGov super app, aron maka-access sa Yaman Ng Kalusugan (Yakap) services ug makakuha sa PhilHealth Access Card. (ECB/PIA7-Bohol)

Panagtagbo Alang Sa Paglambo sa Pamilyang 4Ps Information & Service Caravan nga gipahigayon sa Pilar Cultural and Sports Complex sa lungsod sa Pilar niadtong Nobyembre 20, 2025. (ECB/PIA7-Bohol)