DepEd: Pangtangtang sa Grade 11, 12 

sa sunod school year dili tinuod

TAGBILARAN CITY, Bohol (PIA)--Gipahimangnoan sa Department of Education (DepEd) ang publiko kabahin sa fake news nga nikatap sa social media sa giingong pagtangtang sa Grade 11 ug 12 alang sa school year 2026-2027.

Sa usa ka advisory, ang departamento sa edukasyon nagpahinumdom sa publiko nga magbinantayon sa impormasyon online.

Ang DepEd nagkanayon sa ilang website post nga “Fake news ang kumakalat na post sa social media tungkol sa umano’y pagtanggal ng Grade 11 at 12 para sa SY 2026-2027.”

Subling gipahinumdoman sa DepEd ang publiko nga mag-amping ug magbinantayon sa mga impormasyong mabasa nila online.

Gitambagan usab sa departamento ang publiko nga likayan ang pagsunod sa mga panid nga nagpakaylap og bakak nga impormasyon.

Sa samang paagi, giawhag sa DepEd ang publiko nga i-report dayon ang mga kadudahang panid.

Ang Republic Act No. 10533, nailhan nga "Enhanced Basic Education Act of 2013," nga nagtumong sa pagpalambo sa sistema sa edukasyon sa Pilipinas, gipalugway ang siklo sa batakang edukasyon ngadto sa 12 ka tuig ug gipausbaw ang kurikulum.

Samtang ang DepEd nag-awhag sa publiko sa pagsunod sa mga opisyal nga channel, partikular sa website niini nga https://www.deped.gov.ph/ ug Facebook page https://www.facebook.com/DepartmentOfEducation.PH. (ECB/PIA7-Bohol)

Gi-klaro sa DepEd nga fake news ang nikatap nga post sa social media kalabot sa giingong pagtangtang sa Grade 11 ug 12 alang sa SY 2026-2027. Subling gipahinumdoman sa ahensya ang publiko nga mag-amping ug magbinantayon sa mga impormasyong mabasa online. (DepEd)