PAGMINTINAR SA KATUBIGAN

Pasidungog para sa mga LGUS,

Industriya sa gisugdan og tuki

TAGBILARAN CITY, Bohol (PIA)— Gitutokan karon sa mga tinugyanan nga sakop sa Panglao Island Coastal Water (PICW) Water Quality Monitoring Area (WQMA) ang paghipno sa usa ka sa awards system alang sa mga local nga kagamhanan, mga industriya ug mga katawhan nga mahimong sumbanan sa pagpatunhay sa kahimtang sa kadagatan niing dapita.

Didto sa labing bag-o nga tigum sa Technical Working Group sa Information, Education and Communication sa PICW WQMA, gipadayag ni Kaye Espinosa, secretariat sa WQMA sa PIC nga ila na nga gitun-an ang posibilidad nga makatanyag og mga environmental awards ngadto sa mga LGUs ug mga industriya nga mingtampo aron mapatunhay ang kalidad sa katubigan sa Panglao ug Tagbilaran Seas.

Kahinumduman nga kini usab nga dinhi nga mga lugar, ang katubigan gigamit isip tinubdan sa panud-an, gawas pa nga gigamit nga kaliguan sa mga Bol-anon ug mga turista nga mosuroy nganhi.

Sa kasamtangan, samtang gilantaw sa WQMA nga magpabilin unta nga limpyo ang katubigan dinhi, namatikdan ang mga dili maayong bansay nga possible nga maoy makahatag og kahugaw sa lugar.

Bisan pa man sa tinuig nga mga coastal clean-ups ug environmental campaigns, may mga lugar nga natumbok nga may daghang mga basura kon itandi sa lain nga mga lugar.

Kini karon nga mga dapit nga makit-an nga naghimog mga bansay ug programa nga maglimpyo sa katubigan, angayan lamang usad nga mahatagan sa pasidungog, dayag ni Espinosa.

Segun sa DENR, kasamtangan na nila nga gipanday ang mga sumbanan alang sa pagtugyan sa mga pasidungog, aron usab maaghat ang mga kalungsuran ug industriya nga motabang sa pagmintinar sa kalimpyo sa kalidad sa tubig dinhi. (PIAbohol)

PASIDUNGOG SA MGA LGUS. Gituki karon sa mga sakop sa Panglao Island Coastal Water Quality Monitoring Area ang mga parameters nga magamit aron matumbok ang mga LGUS ug mga industriya nga may tataw nga programa alang sa pagmintinar sa kadagatan, aron sila usab kapasidunggan. (PIAbohol)