Tinabangay pagpatuman sa SLP

gilagdaan tali sa PLGU, DSWD

TAGBILARAN CITY, Bohol (PIA)—Gilagdaan sa Bohol pinaagi ni Gob Erico Aristotle Aumentado ug Department of Social Welfare and Development (DSWD) ang memorandum of agreement (MOA) sa tinabangay sa pagpatuman sa Sustainable Livelihood Program (SLP), atul sa pagbukas sa Civil Society Week sa Bohol, Nobyembre 17.

Samtang ang DSWD maoy natahasan sa pagpatuman sa SLP, nag kagamhanan sa Bohol pinaagi sa Provincial Cooperative Development Office, makatabang sa pagtanyag og mga bansaybansay sa mga benepisaryo sa DSWD SLP alang sa mas epektibo nga pagsinati sa tabang aron makahunat sa tumong niini nga pag-asnat sa mga kabus gikan sa lunang sa kawad-on.

Gawas sa bansaybansay, makahatga usab ang mga tinugyanan sa Bohol pinaagi sa PCDO sa tabang teknikal ilabi na sa mas taas nga lanat sa monitoring, aron katutokan ang pamuhunan sa panginabuhian ug walay pundo nga masayang.

Matud ni Aumentado, ang paglagdaay sa tinabangay, usa ka tataw nga pagpadayag sa panaad nga arsahon ang mga kabus ug mga banay nga nahikawan, nga parehong gialagaran sa DSWD ug sa kagamhanan sa Bohol.

Pinaagi sa pagtinabangay, magbuhi ang himsog nga pamaagi sa pagtampohay sa katakus aron ikatanyag ang mga pagbansay alang sa panginabuhi-an, tabang teknikal ug walay bugto nga monitoring sa mga gilantaw nga mga benepisaryo sama s amga sakop sa 4Ps ug mga panimalay nga wala na sa Pantawid, dugang sa goberndor. (PIABohol)

SAAD SA PAG-AGAK. Gipadayag sa Bohol ug sa DSWD ang ilang mga saad sa pag-agak s amga nagkalisud aron makapaugmad sa ilang kinabuhi pinaagi sa mas tutok nga pagpatuman sa SLP ubanan sa mga gikinahanglang bansay alang s amga nagpatuman niini aron maseguro nga walay kwarta nga tabang nga mausik, (PIABohol)