Halos P1M gihatag isip livelihood
Grant sa duha ka kahugpungan

TAGBILARAN CITY, BOHOL (PIA)—Dul-an sa usa ka milyon ang gitunol sa Kagamhanang Probinsyal ngadto sa duha ka mga kahugpungan alang sa ilang mga proyekyo, atul sa pagbukas sa Civil Society Week, didto sa Reynas Garden, Nobyembre 17.

Gitunol sa Bohol didto sa kalihukan ang P 300 mil nga livelihood grant ngadto sa BAMBOHOL, usa ka kahugpungan s amga mag-uuma nga naginabuhi usab sa paghimo og mga butang gikan sa kawayan.

Lain nga P543,896.00 ang gitunol usab ngadto sa Cagwang Farmer’s Association alang sa pagpahimutang sa gamay nga galingan sa humay.

Ang pagtugyan sa hinabang panginabuhian, nagagikan sa pundo sa kagamhanan ug gipaagi sa Provincial Cooperative Development Office. (PCDO)

Ang PCDO ang buhatan sa Kapitolyo nga nagtutok sa pagtabang sa mga kahugpungan sa pagpahiluna sa ilang mga proyekto alang sa ilang kaugmaran ug sa ilang mga sakop, ug kini usab ang natahasan sa paggiya sa mga kahugpungan aron mas makalahutay kini.

Ang pagtunol sa livelihood grants, gipahigayon Dungan sa ika 13 nga CSO week, diin mahitabo ang mga sectoral nga tigum, makuha sa mga sakop ang serbisyo alang sa health ug wellness, kahatagan og bansay ang mga opisyales sa mga konseho ug mga CSO desk officers.

Mahitabo usab ang general assembly sa Bohol People’s Council, samtang ipahigayon ang pagpananum og kahoy sa mga sakop sa tanan nga accredited CSOs sa Bohol didto sa Loboc Watershed, sundan usab sa teambuilding activities. (PIAbohol)

LIVELIHOOD GRANTS. Dul-an sa usa ka milyon ang gitugyan sa Bohol alang sa duha ka mga kahugpungan nga akredited sa Bohol agi og tabang atul sa CSO week nga gibuksan Nob 17. (PIAbohol)