Kawayan gikampanya isip solusyon

sa daghan’g suliran sa katilingban

TAGBILARAN CITY, Bohol (PIA)—Dili lamang tanom: ang kawayan, solusyon sa mga suliran sa katilingban.

Kini maoy gipadayag sa Department of Trade and Industry (DTI) pinaagi ni Provincial Director Vierna Teresa Ligan, didto sa Bamboo Congress nga nahitabo didto sa JJs Seafoods Village sa miaging semana.

Una, sa nagkagusbat nga kalibutan nga naabusohan ug mingbawos sa pagkahunkak sa yuta ug pagbaha, ang kawayan, abin sa kalikopan.

Matud sa DTI, kinsa maoy convenor sa Bamboo Congress, ang kawayan, mas paspas pang motubo sa mga kahoy, mas dali mosanay ug mas kusog mohigop sa hugaw nga hangin.

Ang usa ka ektaryang kawayanan, makalimpyo og bali og 12 ka toneladas nga hangin sa usa ka tuig, matud ni Ligan.

Kon mananum kita og kawayan, makuhaan nato ang pagsalig sa lasang, makapahiuli s amga na-umaw nga yuta, ug maghatag og kapilian kon manginahanglan og troso.

Ang kawayan, dili lamang tanom, apan usa ka industriya, dugang ni Ligan.

Gikan sa gamit alang sa konstraksyon, muwebles, mga handicraft ug bisan na gani panapton, ang kawayan nagbukas og mga kahigayunan alang sa mga mag-uuma, mga tigsibit ug mga mamumuhunan.

Ang kawayan, gahum alang sa mga komunidad, ug ang pagpadaghan sa kawayan, mapatunhay ang kultura samtang abi abihon ang kabag-ohan, hinungdan nga ang kawayan, dili lamang tanum, apan solusyon sa mga suliran sa panahon.

Niini, nanawagan ang DTI kauban sa United Bohol Bamboo Advocates Incorporated nga padaghanon ug himoon nga prayoridad ang pagpananum og kawayan, isip kasaligan nga haligi alang sa kaugmaran sa kabarangayan. (PIAbohol)

SOLUSYON SA PANAHON. Gisaulog sa Bohol ang Bamboo Congress, dungan sa pagkampanya sa pagpalapad sa kawayanan, dili lamang tanom pagpahiuli sa umaw nga kayutaan apan sa nagkadaghan niining gamit ilabi na sa konstraksyon nga magpagaan sa pag-gamit sa kahoy gikan sa kalasangan. (PIAbohol)