MOA sa pagpanalipod sa watershed sa Loboc

gilagdaan sa mga opisyal sa Bohol ug Canada

TAGBILARAN CITY, Bohol (PIA)--Usa ka dakong lakang padulong sa pagpanalipod sa kinaiyahan ang nakab-ot pinaagi sa paglagda og duha ka mahinungdanong Memorandum of Agreement (MOAs) sa lungsod sa Loboc niadtong Nobyembre 15.

Gipangunahan kini ni Gov. Erico Aristotle Aumentado ug gisaksihan ni Canadian Secretary of State for International Development Hon. Randeep Sarai ug Canada’s Ambassador to the Philippines H.E. David Hartman.

Si Aumentado, opisyal sa PENRO Jose Cleo Colis, Loboc Mayor Raymond Jala ug ang mga mayor sa laing 14 ka lungsod milagda og kasabotan alang sa pagmugna sa Loboc River Watershed Management Council (LRWMC).

Kining nga multi-sectoral body gitahasan sa pag-coordinate sa konserbasyon, rehabilitasyon ug sustainable management efforts sa tibuok Loboc River Watershed, ang kinadak-an sa lalawigan sa Bohol, nga mokabat sa 67,563 ka ektarya ug naglangkob sa 15 ka lungsod.

Samtang gilagdaan usab ang ikaduhang MOA, nga nagpormal sa panagtambayayong tali sa bag-ong natukod nga LRWMC ug Alinea Philippines, implementer sa Governance for Climate and Disaster Resilience (Gov-CDR) Project nga gipondohan sa Global Affairs Canada.

Kini nga kolaborasyon nagtumong sa pagpalig-on sa pagplano nga nakabase sa siyensya, pagkaandam sa komunidad, ug pagdumala nga mabag-o sa klima sulod sa watershed area.

Ang maong kalihukan gitambungan sa mga ahensya sa nasudnong kagamhanan, lakip ang Department of Interior and Local Government (DILG), Department of Environment and Natural Resources (DENR), Department of Public Works and Highways (DPWH), Department of Agriculture (DA), Department of Agrarian Reform (DAR), Department of Science and Technology (DOST), ug National Irrigation Administration (NIA), Bohol Island State University-Bilar, Philippine Red Cross, ug uban pang lokal nga stakeholders.

Ang Kagamhanang sa Probinsiya sa Bohol nagpahayag sa ilang pasalamat sa Gobyerno sa Canada ug Alinea Philippines sa pagsuporta sa mga long-term nga paningkamot sa Bohol sa pagpanalipod sa Loboc River Watershed – usa ka mahinungdanong bahandi sa ekolohiya, ekonomiya, ug kultura alang sa umaabot nga mga henerasyon. (ECB/PIA7-Bohol)

Gilagdaan sa mga opisyal sa Bohol ug Canada ang usa ka landmark nga kasabotan sa pagpanalipod sa watershed sa Loboc niadtong Nobyembre 15, 2025. (hulagway sa PGBh)