Pag-file og retirement 

ug life insurance claims 

sa GSIS, digital na

TAGBILARAN CITY, Bohol (PIA)--Gipalapdan pa sa Government Service Insurance System (GSIS) ilang serbisyo alang sa kasayon sa ilang mga miyembro human gilusad ang bag-ong digital nga sistema alang sa pag-file og retirement ug life insurance claims gamit ang GSIS Touch mobile app.

Niining bag-ong proseso, dili na kinahanglan sa mga mo-retirong mga miyembro nga mosumite og papel tungod kay ang ahensya na mismo ang mopasa sa ilang service record ug uban pang dokumento sa GSIS.

Agi kini og pagsunod sa GSIS Memorandum Circular No. 068, s. 2025, diin kinahanglang isumite online sa government agencies ang service record, retirement date, ug Leave Without Pay certification sa mga mo-retirong kawani 20 ka adlaw sa dili pa ang mismong retirement date.

Matud pa ni GSIS President ug General Manager Wick Veloso, tumong niining sistema nga mapadali ug himuong sayon ang proseso.

“Gusto naming maging worry-free ang pagre-retire ng miyembro. Kapag maaga at tama ang record na isinusumite ng ahensya, mas mabilis nating mavavalidate at mas mabilis nating mailalabas ang benepisyo,” matud pa ni Veloso.

Sa GSIS Touch app, mahimong mag-file og retirement, separation, ug life insurance claims ang inactive members gamit ang facial authentication.

Makita usab nila ang tentative computation sa ilang benepisyo ug real-time status sa ilang claim sa Transaction Monitoring System.

Makadawat ang miyembro og SMS o email kun makumpleto na ang ilang records ug qualified na mag-claim og claims. I-diretso na usab sa ilang bank account ang approved benefits.

Parte kini sa “Ginhawa for All” program sa GSIS aron himuong mas paspas, simple, accessible ang serbisyo sa mga miyembro ug pensiyonado.

Giklaro sa GSIS nga ang digital filing alang lamang sa mga mo-retiro ubos sa Republic Act No. 8291. (ECB/PIA7-Bohol)

Available na karon sa GSIS Touch mobile ang pag-file og retirement ug life insurance. Tungod niini, dili na kinahanglang mo-pila pa ug moduso sa mga paper forms kay mahimo nang mo-file bisan asa, bisan kanus-a diretso sa inyong cellphone. (GSIS/PIA)