Bohol nipaabot sa ilang suporta sa mga LGU

sa Sugbo nga naapektuhan sa Bagyong Tino

TAGBILARAN CITY, Bohol (PIA)--Ang Kagamhanan sa Probinsiya sa Bohol mipaabot sa ilang suporta ngadto sa mga local government unit sa Sugbo nga grabeng naapektuhan sa Bagyong Tino pinaagi sa pormal nga pagtugyan sa pinansyal ug in-kind nga mga tabang niadtong Nobyembre 14.

Mokabat sa P5 milyones nga financial assistance ang personal nga gitunol ni Gob. Erico Aristotle Aumentado sa mga LGU sa Talisay City, Danao City, Liloan, Compostela ug Consolacion nga nakadawat og tag P1 milyones gikan sa Provincial Government of Bohol.

Ang delegasyon gikan sa Bohol giabi-abi ni Cebu Provincial Administrator Ace Durano, nga nagrepresentar kang Gobernador Pam Baricuatro, kinsa kasamtangang nitambong og tigom sa Manila.

Sa iyang mensahe, gipasiugda ni Aumentado ang lig-on nga bugkos tali sa Bohol ug Sugbo, isip nahibiling mga lalawigan sa Central Visayas.

Isip mga silingan, matod pa niini nga andam ang Bohol nga motabang sa Sugbo sa panahon sa katalagman.

Kahinumdoman nga nakadawat usab ang Bohol og dakong tabang gikan sa Sugbo ug ubang LGU dihang nahiagom kini sa linog niadtong 2013.

Ang mga lokal nga ehekutibo ug mga representante gikan sa nakadawat nga LGUs - Talisay City Mayor Samsam Gullas, Consolacion Mayor Teresa Alegado, Compostela Mayor Felijur Quiño, Danao City Vice Mayor Ivy Durano, ug usa ka representante gikan sa Liloan Municipal Treasurer's Office - nitambong atol sa turnover ceremony.

Si Bohol Provincial Administrator Asteria Caberte, Board Member Lawrence Xavier Ancla, Governor’s Office Chief of Staff Atty. Filipina Piollo, PDRRMO Head Dr. Anthony Damalerio, ug PHO Head Dr. Fruserma Mary Uy miduyog sa misyon alang sa Probinsya sa Bohol.

Ang mga in-kind nga donasyon nga nakolekta gikan sa mga Boholano sulod sa semana, opisyal usab nga gitunol ngadto sa Cebu Provincial Government.

Kining hinabang lahi pa sa inisyal nga P5-million nga donasyon sa Bohol sa Sugbo niadtong Oktubre 6 alang sa mga lungsod sa amihanang Sugbo nga naapektuhan sa magnitude 6.9 nga linog.

Gawas niini, ang Bohol Provincial Health Office nag-deploy usab og 11 ka miyembro nga Mental Health and Psychosocial Support Services (MHPSS) team ngadto sa Danao City aron pagtabang sa mga apektadong residente sa ilang pagsagubang ug pag-ayo.

Kini nga paningkamot nahimong kabahin sa One SugBohol initiative, nga nagtumong sa pagpaabot sa panaghiusa ug suporta sa mga komunidad sa Sugbo nga naapektuhan sa bagyo. (ECB/PIA7-Bohol)

One SugBohol. Ang Panggamhanan sa Probinsiya sa Bohol nagpamatuod pag-usab sa ilang pasalig sa panag-uban, kaluoy, ug kolektibong aksyon sa panahon sa krisis human pormal nga gitunol ang mokabat sa P5 milyones nga financial assistance ug in-kind nga mga tabang. Personal nga gitunol ni Gob. Erico Aristotle Aumentado sa mga LGU sa Talisay City, Danao City, Liloan, Compostela ug Consolacion ang tag P1 milyones gikan sa Provincial Government of Bohol niadtong Nobyembre 14 sa Cebu Provincial Capitol. (phot credit: PGBh)