11 ka balay, kamalig nabanlas

Kuyog sa Candanas landslide

TAGBILARAN CITY, Bohol (PIA)— Napulo ug usa ka balay nga nadugmok, na-anod ug nalubong na sa yuta, lain pa nga kamalig, ang inisyal nga sukip sa taho nga gipaambit ni Kapitan Anthony Ladesma sa Barangay Candanas sa Garcia Hernandez.

Maayo na lang kay, sahi sa uban nga mga pagkahunlak ug pagdahili sa yuta, inanay ang nasinati sa purok 1 ug Purok 6 sa Candanas, nga naghatag og higayon sa mga molupyo nga makapanghipos ug makaadto sa luwas nga mga dapit, dayag sa kapitan.

Nagsugod sa namatikdan nga pagpangliki sa yuta sa kilid nga bahin sa pathway nga gipasemento sa barangay aron may kaagi-an, nahingawa ang mga taga barangay kay wala pa maundang ang paglihok sa yuta hangtud nga hingpit na nga nagun-ob ang 300 metros nga agi-anan nga gibanlas na sa ubos nga bahin sa pangpang.

Sa pagsibog, gimandu dayun sa kapitan ang paghiklin ngadto na sa mga kaparentehan, aron may segurado nga katulgan.

Segun sa taho, dili na kapuy-an ang mga balay nila ni Francisco Caceres Sr., Francisco Caceres Jr., Lito Echon, Christian Paypa, Concordio Abaya, Palo Taer, Darius Haloc, Roger Madeloso, Ruben Falcon, Gervasio Falcon ug Romel Falcon, pulos taga purok 1 ug purok 6 sa nahisgutang barangay.

Lain pa nga kamalig nga gipapuy-an ni Gaspar Dahan ang na-angin usab sa pagdahile sa yuta nga karon milanat na sa 5 ka ektarya, segun pa ni Kapitan Ladesma.

Luwas, matud sa Kapitan, apan segurado nga manginahanglan na usab og tabang aron makapatukod og mga balay.

May mga yuta sila, apan ang financial na usab nga suliran sa pagpatukod maoy sunod nila nga problemahon, dayag ni Ladesma.

Nunot niini, nagpadala na ang LGU Garcia Hernandez sa ilang hinabang nga pagkaon alang sa mga biktima, samtang gipaabut usab ni Mayor Jess Baja nga maabagan sila sa Department of Social Welfare and Development alang sa dugang tabang sa mga biktima.

Nanghinaut usab ang mga biktima nga katabangan sa National Housing Authority aron makasugod sila sa pagpatukod og balay, didto na sa mas luwas nga lugar. (PIAbohol)

PULPOG. DIli man kalit sama sa kasagaran nga pagkahunlak sa yuta, wala gihapon makalingkawas ang mga kabalayan nga nagpabiling nagbarug sa naglihok nga yuta didto sa kabukiran sa Candanas, Garcia Hernandez, diin may 11 ka balay ug us aka kamalig ang karon dili na mapunit pa. (PIABohol/Ric Obedencio)