MOA SA SB-Corp-Kapitolyo gilagdaan

Dugang ikapamuhunan

Gipasayon sa SB Corp

TAGBILARAN CITY, Bohol (PIA)— Sanglit kasagaran nga suliran sa labing baga nga mga micro, small ug medium enterprises sa Bohol mao man ang pamuhunan, ania nay kahigayunan nga makakuha’g pundo alang sa pagpalambo sa ilang negosyo.

Kini human gibutyag ni Lourdes Baula, ang Senior Vice President ug Finance Section chief sa SB Corporation, nga aduna pay kapin kon kulang 7,000 ka mga MSMes sa Bohol nga buot nilang maabut sa tabang sa labing ubos nga 1% sa matag buwan nga interes, ug mas gipasayon nga rekisitos.

Matud ni Provincial Administrator Asteria Caberte, nga ang SB Corporation, us aka sanga nga buhatan ubos sa Department of Trade and Industry (DTI) nga nasangonan sa responsibilidad pagtabang sa mga gagmay nga mamumuhunan human gipgawas sa kagamhanan ang Barangay Micro Business Act.

Tabang sa mas sayun nga pautang gikan mismo sa kagamhanan, matud ni Baula.

Kini usab human gilagdaan sa SB Corporation ug sa Kagamhanang Probinsyal sa Bohol pinaagi ni Gob Erico Aristotle Aumentado ang Memorandum of Agreement (MOA) nga magpahimutang sa SB Corp dinhi sa Bohol, aron mas sayun kining makapangalagad sa mga Bol-anon.

Gilagda sa gobernador nga ang Business One Stop Shop sa Kapitolyo nga anaa sa daan nga Kapitolyop, pun=an og lugar alang sa SB Corp aron mas sayun ug duol kini sa mga Bol-anon.

Segun sa Bohol Economic Development and Investment Promotions Office (BEDIPO) kapin pa sa us aka libo ka mga MSMEs ang ilang naabagan ngadto sa SB corporation.

Lain usab nga 2,000 ka mga MSMEs nga didto niagi sa DTI ang nakakuha usab og pamuhunan gikan sa SPB Corporation.

Mibutyag usab ang DTI nag may dul-an sa 11,000 ka mga MSMEs dinhi sa Bohol, kasagaran kanila nangita pa og ikadugang sa ilang mga puhunan aron makapalapad sa ilang mga negosyo. (PIABohol)

DUGANG PAMUHUNAN. Gilagdaan ni Gob Erico Aristotle Aumentado ang kasabutan sa SB Corporation sa DTI nga maghatag og kahigayunan sa mga Bol-anon nga makahuwam og puhunan sa mas sayun nga paagi human gitanyag sa Kapitolyo ang pwesto sa SB Corporation sulod sa BOSS Center sa BEDIPO sa daan nga Capitolyo. (PIABohol)