CVIF Jagna nakakuhag P2.4M

alang sa Astronomy research

TAGBILARAN CITY, Bohol (PIA)— Gamiton na sa Pilipinas ang bentaha niini nga lokasyon nga anaa sa labing piskay nga pwesto aron mapanid-an ang dagan sa kabituonan.

Kini human gipundohan sa kagamhanan ang P2.4M nga grant sa usa ka Bol-anong tunghaan aron makahimog research pinaagi sa pagpabarug sa labing una nga radio-based astronomy observation station sa Pilipinas.

Pinaagi sa Department of Science and Technology Bohol Provincial ST Office, ang Central Visayan Institute Foundation (CVIF) sa Jagna, Bohol, sa 2.4-million grant niini, makasugod na sa sa paghiman sa nag-unang research nga magpabarug ang RadioJOVE-based radio astronomy observation station sa nasud.

Ang Radio JOVE usa ka inisyatiba nga gisuportahan sa National Aeronautics and Space Administration (NASA) isip usa ka hands-on educational ug citizen science project nga magtugot sa mga estudyante, mga magtutudlo ug mga amateur astronomers, apil na ang publiko aron makahimo kini sa ilang kaugalingon nga simple nga simple radio telescopes aron makapaniid ug makatuon kabahin sa natural radio emissions gikan sa mga buwan, bituon ug planeta lakip na ang mga kabtangan sa kapunawpunawan.

Kining mga signals, importante alang sa pagsabut sa space weather, nga mas daku og epekto sa komunikasyon, paglawig tadlas sa kadagatan ug kapanganuran, pagpangandam batuk sa katalagman.

Sa tibuok Pilipinas, wala pay estasyon nga nalista ilawom sa global Radio JOVE map nga gimantala sa Nasa, matud pa sa DOST Bohol.

Agi og timbang sa RadioJOVE station, ang proyekto nga napundohan maglakip usab sa pagkabit ngadto sa SkyNet Robotic Telescope Network, nga naglangkob sa kapin sa 20 ka robotic telescopes sa lima ka mga nasud sa 4 ka kontinente sa kalibutan.

Kini magpalapad na unya sa akses sa mga researchers sa international optical telescopes alang sa dugang mga pagtuon sa mga planeta nga tua na sa lagyo.

Ang mga makaplagan unya sa proyekto ipaambit ngadto sa katawhan pinaagi sa Learning Activity Sheets gamit ang CVIF Dynamic Learning Program (DLP) framework, aron mas dali nga sabton ang mga teknikal nga konsepto alang sa mga yanong estudyante, magtutudlo, siyentipiko ug researchers, dugangs a DOST Bohol.

Niini, milaum ang DOST nga ang kabataan sa Bohol magamhan sa mga katakus nga gikinahanglan alang sa pagtuon sa space science, data analytics samtang ma-enganyo ang sunod nga henerasyon sa pag-explore ug pag-ugmad sa kasibut alang sa astronomiya.

Nagtuo usab ang kadaghanan nga kini nga opurtunidad makatabang sa Bohol alang sa damgo niini nga maka-ugmad pinaagi sa paghimog nga smart solutions sa mga suliran nga giatubang niini. (PIABohol)

SMART SOLUTIONS. Pinaagi sa mga scientists nga mga Bernido sa CVIF, makasugod na unya ang mga Bol-anon sa pagpaniid sa lihok sa mga planeta nga may kalambigitan usab sa mga klima nga sagad makaapekto sa mga kinabuhi sa katawhan. Us aka pagbukas sa kapunawpunawan ang gihimo sa CVIF ug DOST Bohol. (PIABohol)