DOST mipundo og P3.59M

CEST alang sa San Miguel

TAGBILARAN CITY, Bohol (PIA)—Sa proyektong Community Empowerment through Science and Technology (CEST) gipundohan sa Department of Science and Technology Bohol Provincial Science and Technology Center (DOST-PSTC) ang pagpaayo sa nangaguba nga radio repeaters sa lungsod sa San Miguel .

Himan nga labing kamahinungdanon labi na sa panahon sa katalagman ug kalisud, ang radio repeater system sa lungsod kanhi nagbugkos sa tanan nga barangay sa lungsod sa usa ka tinubdan sa kasayuran: ang ilang napabarug nga sistema sa komunikasyon.

Pinaagi sa P3.59 milyones nga pundo gikan sa DOST CEST, gawas nga ipaayo ang mga repeater station sa mga radio nila didto, matud ni Vina Antopina, hepe sa DOST Bohol PSTC nga himoon na kining moderno nga digital two-way radio repeater network nga padaganon sa solar power.

Importante ang kasaligan nga tinubdan sa koryente nga mopaandar sa digital repeater systems kay segun sa nasinati sa mga katawhan kaniadto, magkalisud gihapon sila sa komunikasyon kon mohagsak ang koryente kay mawala usab ang signal sa mobile phones.

Usa ka daku nga lakang alang sa pagpalig-on usa sa pagpangandam sa kalungsuran alang sa katalagman ug mga dili matagna nga panahon, gawas sa pagpalig-on sa mga radio, kini magtabang usab pagpadagan sa digital signal nga magamit sa pagpakat-on sa mga kabataan ug abag sa mga magtutudlo, segun sa DOT Bohol.

Kini kay apil sa gipundohan mao ang pagpahiluna alang sa pagpahimutang sa DOST Science and Technology Academic and Research-Based Openly-Operated KioskS (STARBOOKS), ang digital offline nga science and technology library nga anaa sa usa lamang ka kiosk.

Gilantaw sa tinabangay sa lungsod ug sa DOST nga magpahimutang og tagsa ka STARBOOKS digital library sa 23 ka mga tunghaang pangpubliko sa lungsod, gawas pa, nga ang digital repeater stations mao usab ang saligan sa walay pagka-awop nga komunikasyon alang sa kinatibuk-an nga 18 ka barangay sa lungsod.

Niini, gawas sa Municipal Disaster and Risk Reduction Management Council ug mga emergency responders niini, magamit usab kini sa Philippine National Police, Bureau of Fire Protection, ug sa Rural Health Unit.

Pinaagi sa proyekto, ang mga Emergency responders ug ang barangay DRRM teams moa-gi sa bansaybansay alang sa epektibo nga paggamit sa mga himan ug sa pagpakigbayloay sa kasayuran ug koordinasyon ilabi na sa panahon sa katalagman.

Tumong sa DOST CEST nga palig-onon ang kapasidad sa komunidad sa pagtubag sa hagit sa katalagman samtang ikapalapad ang kasayuran alang sa mga komunidad, mga magtutudlo ug mga kabataan nga nagkat-on. (PIABohol)

REAL TIME NGA KASAYURAN. Pinaagi sa pagpakigpartner sa DOST Bohol, napundohan pinaagi sa CEST ang pagpaayo ug pagpamoderno sa komunikasyon sa San Miguel, mga mao usab ang sakyan sa digital nga signal alang sa pagpalapad sa kahigayunan sa pagkat-on pinaagi sa digital libraries nga madawat sa tanang tunghaang publiko didto. (PIABohol)