P505M shares sa Ubay Solar Farm

napalit sa Aboitiz Renewables Inc.

TAGBILARAN CITY, Bohol (PIA)—Napalit na sa ABOITIZ Renewables, Inc., ang 55,000 ka shares sa kompanya nga naga-ugmad sa usa ka solar farm sa Bohol sa kantidad nga P505 M.

Ang Aboitiz Renewables, usa ka subsidiary sa Aboitiz Power Corp. (AboitizPower), mibayad sa $8.55 milyones ngadto sa Ignis Philippines Development Inc., (P505 milyones) alang sa kinatibuk-ang shares sa kompanya nga maoy nag-ugmad sa Ubay Solar Farm.

Sa pagkahalin sa 100 prosyento nga equity interest sa Ubay Solar Corp., ang Aboitiz Renewables na ang tag-iya sa tanan nga shares o membership interests, may kinatibuk-an nga control sa mga desisyon niini, kay walay nay minority interest ug ang kita niini, solo na nga iyaha sa nakapalit nga kompanya.

Kahinumduman nga ang Ignis Philippines Development, Inc nga may nag-ugmad sa Ubay Solar Corporation maoy unang mingtanyag nga mag-ugmad sa 137-megawatt (MW) nga solar project dinhi.

Ang pagpalit sa 55,000 ka shares sa Aboitiz sa Ubay Solar Farm, natibawas human ang Ignis mipadayag sa laraw niini nga itugyan na kini sa lain nga tag-iya.

Pinaagi sa pagkapalit sa nahisgutang pasilidad alang sa renewable energy, kini makapasutoy sa tumong sa AboitizPower nga padaghanon pa ang ilang kapasidad alang sa limpyong energiya ug palig-onon ang iyang posisyon isip nag-una nga kompanyang nana-ad alang sa pagsuporta sa mas malungtaron nga transisyon sa Pilipinas ngadto sa malungtaron, kasaligan ug limpyong enerhiya.

Ang napalit nga pasilidad gilantaw nga mahuman sa 2026 samtang magsugod na sa iyang commercial operations sa 2027, segun sa mga taho. (PIAbohol)