Frontline services sa turismo

45 nabansay sa Kinoreano,

Hinapon, pinaagi sa TESDA

TAGBILARAN CITY, Bohol (PIA)— Gitunol sa Technical Education and Skills Development Authority (TESDA) dinhi sa Bohol, ang mge sertipiko nga nagpamatuod sa pagtapos sa 16 ka mga gibansay sa pinulungang Koreano ug 29 ka mga nabansay sa pinulongan nga Hinapon, isip labing bag-ong frontliners alang sa gipaladpan nga frontline nga serbisyo sa turismo dinhi.

Ang pagbansay sa pinulongan may klasipekasyon nga A1 o top level ug mahatagan sa National Certification II sa TESDA.

Ang pagtapos sa mga pagbansaybansay gitambongan mismo nila ni TESDA Deputy Director General for Special Concerns Felizardo Colambo, National Language Skills Center Chief TESD Specialist Mitzi Samon-Endriano, TESDA-VII Regional Director Engr. Gamaliel B. Vicente, Jr., TESDA-Bohol Provincial Director Floro T. Ringca, mga Training Center Directors sa tibuok TESDA Provincial Training Centers sa Bohol ug mga opisyales sa Kapitolyo pinangulohan ni Gob Erico Aristotle Aumentado.

Sa iyang solidarity message, si Aumentado nagkanayon nga samtang ang Bohol padayon nga nagpalapad sa iyang mga tanyag alang sa turismo, angayan lamang usab nga madugangan ang kahanas sa mga Bol-anon sa kahanas sa pagsulti sa laing pinulongan sa mga frontline alang sa mas maayong serbisyo.

Kahinumduman nga ang Language Training Programs gibuksan niadtong Octubre ug pinaagi sa online, kinahanglang makompleto sa us aka trainee ang 152 ka oras o katumbas sa 38 ka adlaw nga bansaybansay, gikan sa Lunes ngadto sa Sabado.

Ang bansaybansay nga gipahigayon sa paghangyo sa Bohol Tourism Office, gilauman nga makatabang sa frontline services sa turismo ilabi na isip tighubad sa kasayuran ilabi na karon nga ang bag-ong tourism code nagpahimutang na sa mga probisyon nunot niini. (PIAbohol)

SUPORTA SA TURISMO. Mingtapos sa Language Training sa Korean ug Japanese ang 45 ka mga gibansay pinaagi sa TESDA National Certification II program aron maandam alang sa frontline services sa turismo. (PIABohol)