Hugot-bakus samtang

koryente ming-mahal

TAGBILARAN CITY, Bohol (PIA)—Hugot-bakus una ug magdaginot sa paggamit sa koryente, kay may wala damha nga pagsaka sa bili sa koryente karong buwana, pahimangno sa mga tinugyanan, lakip na sa Bohol Light Company Incorporated, pinaagi sa tag-iya niini nga More Electric Power Corporation (MorePower).

Kini kay, samtang mingdako ang supply ug mingkunhod ang panginahanglan sa koryente sa Luzon, nagkuwang ang supply ug sa daku pa gihapon ang kasamtangan nga panginahanglan sa koryente sa Visayas ug Mindanao.

Ug subay sa ekonomikanhong prinsipyo sa supply and demand, mingbarato ang presyo sa koryente sa Luzon apan halos doble ang presyo sa koryente sa Visayas ug Mindanao sa bili niini sa mi-aging buwan.

Samtang nagsobra ang koryente sa Luzon, nagdungan-dungan usab og pagkapalyar sa mga planta sa Visayas ug Mindanao, samtang nalimitahan ang akses sa supply sa mas barato unta nga koryente gikan sa Luzon, nga nagdugang sa mga rason ngano nga apektado ang presyo sa koryente dinhi, dayag sa MorePower.

Ubos sa normal nga kondisyon, ang Visayas gisuportahan sa Luzon pinaagi sa Leyte–Luzon High Voltage Direct Current interconnection, apan niadtong Disyembre, limitado lamang sa 250 megawatts ang koryente nga nakasulod, pun-an pa sa gikinahanglang pag-undang sa serbisyo niini alang sa regular nga maintenance sa linya, dugang sa pahayag nga gipaambit sa More Power Electric Corporation.

Sa susamang panahon, daghang planta sa Visayas ug Mindanao ang wala palandonga nga ma-shutdown, hinungdan sa samot nga pagkuwang sa supply, mao nga kinahanglan na nga gamiton ang mas gastoso nga Battery Energy Storage Systems (BESS) ug uban pang mas mahal nga tinubdan sa local nga suplay.

Tungod niini, ang regional nga presyo sa koryente nagdagan sa tag P 7.86–8.53 matag kilowatt, kon itandi sa mi-aging buwan nga 4.38 PHP/kWh, ngadto sa 3.98 PHP/kWh.

Sa Luzon, ang bili sa koryente anaa sa tag P2.98 ngadto sa P3.52 ang /kWh. (PIABohol)