191 Kauban sa Reporma

nangaplay og amnestiya

TAGBILARAN CITY, Bohol (PIA)—Aduna nay 191 ka mga Bol-anon nga kanhi rebelde apan karon Kauban na sa Reporma (KR) ang ming-aplay ug nangindahay nga mahatagan sa amnestiya.

Apan milaum pa gihapon ang mga tinugyanan sa Bohol nga may maka-apas pa ang uban samtang nagkaduol na ang Marso 13, ang adlaw nga mohupas na ang gahum sa pagduso sa amnestiya.

Kini samtang hangtud Marso 13 na lang pwede nga mo-aplay ang mga nangandoy nga mapapas na ang ilang mga salaod nga ilang nahimo samtang diha pa sa kalihukan, kon mahatagan sa amnestiya, matud ni Bohol focal person sa Provincial Peace and Order Council Task Force Ending Local Communist Armed Conflict, Romeo Teruel.

Ang amnestiya, usa ka talagsaon nga tanyag sa usa ka goberno nga magpasaylo sa mga tawo ug mga pundok aron mapapas na ang tulubagong criminal sa mga salaud nga nabuhat pagpaabante sa politikanhong tinuohan sama sa rebelyon.

Kahinumduman nga gimandu ni Presidente Ferdinand Marcos Jr., pinaagi sa Presidential Proclamation 404 ang amnestiya alang sa mga sakop sa Communist Party of the Philippines, National Democratic Front ug New People’s Army alang sa Bohol.

Alang niini, gipabarug sa Bohol ang Local Amnesty Board (LAB) aron maoy magsilbe nga local nga buhatan sa National Amnesty Commission nga maoy manawat sa mga aplikasyon, pasabut ni Teruel.

Ang LAB matultolan diha sa sulod sa Buhatan sa Provincial Cooperative Development Office sa ground floor sa Kapitolyo.

Sa mga buot makakuha sa amnestiya, kinahanglan sila nga motahan sa kaugalingon ngadto sa kagamhanan, moangkon sa ilang salaud nga nahimo subay sa nasang-at sa mga korte ug makaduso sa aplikasyon alang niini, taman sa Marso 13, tugon ni Teruel.

Sa mga adunay gikatampo sa kalihukang walhon, ayaw palabya ang kahigayunan kay wala kita masayud kon may lain pa bang tanyag sa amnestiya, matud ni Charra Nicole Alinob, hepe sa LAB Secretariat. (PIABOHOL)

PAHIMUSLI ANG HIGAYON. Dili kanunay itanyag ang amnestoya, ug kon mapapas niini ang mga salaud nga nahimo sa panahon nga gipaasdang ang politikanhong katuyuan, nganong dili man kini pahimuslan, pasabut ni Romeo Teruel sas PPOC Bohol. (PIAbohol)