ASPIRE magtabang sa Bohol

mamahimong model sa RE

TAGBILARAN CITY, Bohol (PIA)—Usa ka proyekto nga magpahiluna sa Bohol isip may lig-on, inambitan ug kasaligan nga modelo sa pagsagop sa renewable energy ang gilantaw sa Bohol Association of Non-Government organizations Incorporated (Bangon Inc.), sa pagpakig-alayon sa usa ka philanthropic nga Tara Climate Foundation (TCF).

Kini maoy gipaambit ni Bangon Renewable Energy Project Manager Engr Jerrey David Aguilar, didto sa Kapihan sa PIA.

Proyekto nga ipatuman sa lima ka tuig, kini’ng Advancing Sustainable Provincial Investments in Renewable Energy (ASPIRE) magtabang paghipno sa mga polisiya nga magpahimutang sa Bohol nga kasaligan nga modelo sa mga nasud ug probinsya sa makiangayan nga pagtikang ngadto na sa pagpili sa tinubdan sa may limpyo nga renewable energy.

Kay ang Bangon daan na nga ilang naandan nga adbokasya ang may kalambigitan sa kalikopan, kauban sa siyam nila ka NGOs nga may nagkadaiyang community engagements, ilang gitutokan ang pamaagi nga makatabang nga ikapaasdang sa Bohol ang agenda niini sa renewable energy.

Si Bangon Executive Director Francis Bernard Batoy, mibutyag nga kay ang ilang adbokasya, subay kanunay sa kalikopan, ang renewable energy nagtubag ilang hisgutanan ilabi na kabahin sa nagka-usab nga panahon.

Daan na nga mingbarug batok sa pagtukod og coal-fired power plant dinhi sa Bohol, ang Bangon apil sa mga nangita og solusyon nga kapilian, nakasumpay TCF nga may susama nga katuyuan.

Sa katungod sa Singaporean philanthropic foundation nga Tara Climate Foundation, naghimo sila og pagtuon kon diin sa Pilipinas angay ipahimutang ang proyekto sa makiangayon nga renewable energy transition gikan sa fossil fuels, dayag ni Aguilar.

“Pinaagi sa ilang pagtuon, nakita sa TCF and kadaku sa potential sa Bohol nga mamahimong model sa maki-angayon nga renewable energy transition,” matud pa ni Aguilar.

Sa diskusyon sa kalibutan sa nagkausab nga panahon, daku ang gikatampo sa fossil fuels sa hinungdan sa nagkainit nga kalibutan, duol sa 70% sa heat emissions sa kalibutan, naggikan sa enerhiya ug pagprodyus niini, saysay niya.

Ang solusyon karon mao ang paglikay sa paggamit ug pagkonsumo sa gimugna sa fossil fuels sama sa bunker fuel, gasolina, krudo ug uling igsusugnod, dinhi mosulod ang renewable energy isip tubag.

Dili sayun ang pagbalhin dayon, pagtuo sa Bangon tungod sa kabaga sa sector nga nagsalig pa gihapon sa fossil fuels karon.

Niini, pinaagi sa TCF ug sa ASPIRE sa Bangon, uban sa kagamhanang probinsyal, ikalatag na ang Provincial Renewable Energy Code, mapanday ang mga polisiya sa pagpamuhunan niini ug ikatanyag ang mga insentibo aron human sa proyekto, makasulod na nga walay langan ang mga tigpamuhunan nga magpalig-on sa renewable energy positioning sa lalawigan. (PIABohol)

SOLAR, HYDRO, BIOMASS ug WIND. Kini ang mga tinubdan sa renewable energy nga mahimong ipahimutang sa Bohol Renewable Energy Investment Assessment Framework sa BISU ug sa BIDEF aron ilhon kon unsa ka viable ang proposals, pasabut ni Engr Jerrey Aguilar sa Bangon. (PIABohol)