Bohol Medical Society nipahimangno sa publiko batok

sa mga klinika nga gidumala sa dili mga mananambal

TAGBILARAN CITY, Bohol (PIA)--Ang Bohol Medical Society (BMS) nagpatunghag seryoso nga mga kabalaka sa pagdagsang sa mga klinika nga gidumala sa dili mga mananambal, nagpasidaan nga kining mga establisemento naghatag og dakong risgo sa panglawas sa publiko.

Sumala pa sa BMS, daghang mga klinika—gikan sa mga sentro sa aesthetics, chiropractic ug bone-setting services, ngadto sa mental health clinics—aktibong nag-anunsyo sa ilang mga serbisyo sa conventional ug social media platforms nga walay hustong regulasyon.

Matud pa nga kini nga mga klinika gikataho nga nag-diagnose sa mga pasyente, nagreseta sa mga tambal, ug naghimo og mga medikal nga pamaagi, mga aksyon nga klaro nga paglapas sa balaod sa Pilipinas.

“Health is a basic human right that must always be upheld. The illegal practice of medicine must be curbed to protect the general public (Ang kahimsog usa ka batakang katungod sa tawo nga kinahanglan kanunay nga ipadayon. Ang iligal nga praktis sa medisina kinahanglan nga mapugngan aron mapanalipdan ang kinatibuk-ang publiko),” matud pa sa gipagawas nga pahayag sa BMS niadtong Pebrero 3, 2026.

Gidugang pa niini nga sa bisan unsang dili regulated nga praktis, walay tulubagon sa mga kasaypanan o komplikasyon, nga mahimong grabeng makaapekto sa kalidad sa kinabuhi sa mga pasyente.

Ang BMS nag-awhag sa publiko sa pag-verify sa mga kredensyal sa mga healthcare providers ug sa pagpangayo kanunay og balido nga Physician PRC nga lisensya sa dili pa moagi sa bisan unsang pagtambal.

Gihatagan og gibug-aton sa BMS nga kining maong pamahayag kabahin sa padayon nga responsibilidad niini sa pag-edukar sa komunidad ug pag-amping sa kahimsog ug kaayohan sa katawhan sa Bohol.

Sila nag-awhag nga kanunay siguradohon nga ang atong kahimsog anaa sa mga kamot sa mga lisensyado nga mga propesyonal. (ECB/PIA7-Bohol)

Ang Bohol Medical Society nipagawas og pahayag niadtong Pebrero 3, 2026, tungod sa kabalaka sa pagdagsang sa mga klinika nga gidumala sa dili mga mananambal ug nipasidaan nga kining mga establisemento naghatag og dakong risgo sa panglawas sa publiko. (BMS/PIA)