250 ka tawo carrying capacity

Sa PIPS sa matag duha ka oras

TAGBILARAN CITY, Bohol (PIA)—Bukas na usab ang Isla Pungtod ug Virgin Island sandbar niini, apan lahi kaniadto, 250 ra ka tawo ang makapundo sa lugar sulod sa duha ka oras lamang.

Kini usab subay sa panawagan ni Gobernador Erico Aristotle Aumentado nga tabangan ang Department of Environment and Natural Resources (DENR), Protected Area Management Board (PAMB), Bohol Provincial Local Government Unit (PLGU Bohol), Municipality of Panglao ug Municipal Agriculture Office sa Panglao ug ang mga people’s organizations aron magbantay nga dili kaabusahan og balik ang lugar.

Matud sa gobernador, ibalanse, bisan kon kompetisyon ang turismo, dili mahimo nga kalimtan na lang ang kalikopan tungod sa panginabuhi-an.

Kini usab tungod sa panginabuhi-an nga napaundang human girekomendar sa mga ahensya ug sector ngadto sa gobernador nga sirad-an una ang mga kalihukan sa Virgin Island, nga gidumog sa mga turista ug mga sakay sa panahon.

Ipatuman na ang one entry, one exit sulod sa PIPS, diin ang mosulod sa lugar kinahanglang modunggo una sa Puntod island alang sa ticketing, pagbayad sa entrances ug sa gikinahanglan nga orientation sa mga gimbuhaton sulod sa PIPS.

Sa puntod usab ibilin ang mga turista sa dili pa mobalhin ang sakayan ngadto sa tumbok nga pundohanan, samtang nagpaabut nga mahuman ang duha ka oras nga gitugot.

Kini maoy pipila lamang sa mga natala nga mga polisiya nga sundon human gikasabutan sa mga pagplano sa PAMB, kauban sa DENR, DOT, PLGU, Panglao LGU, Panglao MAO ug mga NGOS didto.

Daghang mga gasang kaniadto ang nangadaut kay matumban sa walay regulasyon nga pagpasulod sa mga tawo, pagpatuyang sa mga illegal nga tour operations, ug kawalay tataw nga polisiya sulod sa PIPS.

Kining tanan, gipatuman aron kanunay nga gisuroy nga mga lugar sulod sa PIPS, labi na ang virgin island sandbar, aron mapanalipdan ang kaanindot niini ug mapatunhay ang kalikopan, matud ni Gobernador Erico Aristotle Aumentado.

Si Aumentado kauban ni DENR Regional Director Laudemar Salac, PENRO Jose Cleo Cary Colis, Cenro Glecerita Racho, Bohol Tourism Officer Joan Pinat Panglao, ug Panglao Mayor Edgardo Arcay ang personal nga mingtambong sa makasaysayanong pagbukas ug usab. (PIABohol)

GIDAGSANG DAYON. Sa adlaw nga gibuksan og balik ang Puntod ug Virgin Island Sandbar niini, walay unos ang nakapugong sa pagdagsang sa mga turista. Kanhi gipasirad-an tungod sa abuso ug kakuwang sa tataw nga polisiya, karon, namugna na ang PIPS Marin Tourism Guidelines nga naglatid kabahin sa mga panalipod aron motunhay ang kalikopan sa sikat nga sandbar sa Panglao. (PIABohol)