Butanding interaction ibalik

Kon wala nay feeding- Aris

TAGBILARAN CITY, Bohol (PIA)— Gitataw sa labing taas nga opisyal sa Bohol nga pwede na isunod og abri ang whaleshark inter-action sa Lila, apan sa usa ka kondisyon.

Didto sa iyang pakigpulong atubangan sa mga opisyales sa Department of Environment and Natural Resources (DENR), Department of Tourism (DOT), mga opisyales sa Bohol ug sa Panglao, gibutyag ni Gobernador Erico Aristotle Aumentado nga mahimong buksan pagbalik ang butanding inter-action sa Lila, kon mosaad ang operators nga wala nay pagpatuwa sa mga ihalas nga mananap sa dagat nga mahitabo.

Ang pagpatuwa o paglawog sa mga butanding, segun pa sa mga batid, dili maayo nga bansay tungod kay kini magpausab sa kinaiya sa mga mananap, maghimo kanila nga magsalig na lang sa pagkaon nga ihatag ug makuwangan sa gikinahanglang nutrina aron molahutay.

Gawas pa, ang pagpakaon sa butanding, maghimo kanila nga magsunodsunod kon hain ang may bangka tungod sa pagkaon, ug magbutang sa mananap sa peligro nga maigo sa sabad sa mga sakayan de makina, masamad ug mamatay na hinuon, dayag sa mga eksperto.

Nunot usab niini, gipangayo usab sa mga tinugyanan sa Bohol ang normal nga mga rekisitos alang sa pagtukod og mga negosyo subay sa balaod.

Daghan ang nagtuo nga gikinahanglan pa nga makakuha og Environmental Compliance Certificate (ECC) sa DENR ang pasilidad nga nag-operate sa Whale Shark Inter-action, tataw nga mga permits ug lisensya sa ilang operation isip tourism establishment.

Wala pa matataw kon may ECC na ba ug may tukma na bang permits ang operasyon sa whaleshark dihang nagsige pa kini.

Gipasabut sa gobernador nga kini mao’y gimandu sa balaod, ug gitukbil usab sa ordinansa sa Bohol, mao nga kinahanglan lamang usab nga ipatuman.

Milaum usab ang kadaghanan nga makahimo ang mga tagdumala og stakeholders sa usa ka marine wildlife interaction guidelines, susama sa gikasabutan nga napanday alang sa Panglao Island Protected Seascapes (PIPS). (PIABohol)

SUBAYON ANG BALAOD. Mahimo ra nga ibalik ang napaundang nga Whale Shark (butanding) inter-action sa Lila, kon ikapatuman ang no-feeding u gang mga balaod nga gikinahanglan sa mas sustenable nga tourism operations, saad ni Gob. Aris Aumentado didto sa pagbukas sa Panglao Island Protected Seascapes. PIA bohol/RVO)