Bohol mipasalig maghipno sa

pagpatuman sa ‘third bridge’

TAGBILARAN CITY, Bohol (PIA)—Gipasalig ni Gobernador Erico Aristotle Aumentado ngadto sa opisyal sa Pransya nga tabangan paghipno ang mga gum-os sa pagpahiluna na unya sa katapusang sumpay sa Panglao Tagbilaran City Offshore Bridge Connector nga magpahanoy sa trapiko gikan sa pantalan sa Tagbilaran nagdto na sa isla sa Panglao.

Ang pasalig sa gobernador, nunot na usab sa saad sa nasudnong kagamahanan sa nasud nga Pransya, kinsao maoy mingtanyag og pahuwam sa P7.1 bilyones ngadto sa nasudnong kagamhanan alang sa tungatunga nga magsumpay sa nasugdan na nga tulay sa Pook ponatalan ug Totolan Dauis.

Pinaagi ni Director of the Development Center for Studies and Expertise on Risks, Environment, Mobility and Planning sa French Embassy sa Manila nga si Marc Raynal, gipadayag sa nasud nga France ang ilang gilikayan kabahin sa mga proyekto sa nasudnong kagamhanan nga ilang pundohan nga wala mapahiluna og tarung.

Alang sa Bohol, nahingawa ang kagamhanan sa France sa mga isyu kabahin unya sa epekto sa proyekto ngadto sa katawhan, sa kalikopan ug sa kinatibuk-ang pagpangandam niini.

Samtang gisaysay ni Planning Officer Atty John Titus Vistal ang kamahinungdanon sa ikatulo nga tulay dala sa nagkahuot nga agi-anan sa duha ka kasamtangan nga taytayan pasulod-gawas sa Dauis, iyang gipasabut ang epekto sa tulay nga magpadali sa dagan sa patigayun ug turismo sulog ug gawas sa Panglao, mituo si Dir Raynal sa ka importante sa mga tulay.

Tulay nga motadlas gikan sa pook pantalan sa Tagbilaran ngadto na sa Totolan Dauis, mga 2.5 kilometros ang kalayoon, ang unang 1.5 kilometros una na nga nakompleto sa mi-aging mga tuig.

Giingon nga pundohan unta sa nasud nga China pinaagi sa grant, ang usa ka kilometro nga katapusang hugna sa tulay, apan human nahilum, gisawo karon aron pundohan na sa nasud nga France.

Niini, gibisita ni Raynal ang Bohol aron ikatigum ug matimbangtimbang ang kapasidad sa mga mopatuman sa multi-billion nga proyekto: ang mga engineers, contractor nga gipili sa France, ang kapasidad sa DPWH nga magdumala sa proyekyo ug ang mga ginagmay nga hipno-onon aron kasugdan na ang katapusang hugna sa proyekto.

Hinuon, kontento si Raynal sa iyang nakita samtang gidason nga masugdan na ug mahimong taposon ang tulay sa tulo ka tuig. (PIABohol)

NASUDNONG PROYEKTO. Samtang nagagikan sa Bohol ang sugyot sa Tagbilaran City Panglao Offshore Bridge Connector, gikaendorso kini samga local nga konseho sa pagpa-ugmad hangtud ming-abut sa NEDA ug gisagop na sa nasunong kagamhanan, mao nga ang nasudnong kagamhanan na ang nagpahiluna sa mga rekisitos sama sa mga permits ug clearances, feasibility ug environmental impact sa pagtukod, apan bisab pa, gipasalig ni Gob Aumentado nga motabang ang Bohol paghipno sa mga suliran unya nga motumaw. (PIAbohol)