DSWD nangayo og input sa publiko sa

paglusad sa Free Funeral Service Act

TAGBILARAN CITY, Bohol (PIA)--Gibuksan sa Department of Social Welfare and Development (DSWD) ang public consultation period alang sa implementing rules and regulations (IRR) sa Republic Act 12309, usa ka bag-ong balaod nga nagmando sa libreng serbisyo sa lubong alang sa mga kabus nga pamilya sa tibuok nasud.

Ang administrasyon ni Presidente Ferdinand R. Marcos Jr. paspas nga milihok sa pag-institutionalize sa programa, nga sagad nailhan nga Free Funeral Service Act, ubos sa DSWD's Assistance to Individuals in Crisis Situations (AICS).

Si Assistant Secretary ug tigpamaba sa DSWD Irene Dumlao mi-awhag sa mga ahensya sa gobyerno ug civil society organizations niadtong Miyerkules sa pagsumite sa ilang mga rekomendasyon aron maseguro nga ang programa magpabilin nga “responsive and inclusive.”

Matud pa ni Dumlao nga gusto nilang ipatuman ang Free Funeral Service Act sa labing daling panahon aron mahupay ang palas-anon sa atong mga katagilungsod nga nagbangutan sa pagkawala sa usa ka sakop sa pamilya.

Ubos sa bag-ong balaod, ang gobyerno mohatag og standardized “indigent funeral package” sa mga pamilya nga anaa sa krisis. Kini naglakip sa pag-andam sa mga dokumento sa paglubong ug pag-embalsamar, paghatag og lungon o urn ug mga serbisyo sa pagsunog, paglubong, ug transportasyon.

Ang balaod nagpaila usab sa higpit nga silot alang sa mga funeral establishment nga magdumili sa paghatag niini nga mga serbisyo sa mga kwalipikado nga benepisyaryo, nga adunay multa nga moabot sa P400,000 ug ang potensyal nga pagbawi sa mga permit sa negosyo.

Alang sa dugang nga impormasyon o sa pagtan-aw sa draft IRR, bisitaha dinhi: https://bit.ly/4rZK5lM.

Ang mga komento ug sugyot mahimong ipadala ngadto kang Ms. Karlene Grace Tandang pinaagi sa kgztandang@dswd.gov.ph ug sa DSWD’s Department Legislative Liaison Office pinaagi sa dllo@dswd.gov.ph uban sa subject: Comments on Draft IRR of RA 12309 (Free Funeral Service Act).

Gitakda sa Marso 6, 2026 ang deadline sa pagsumite sa mga komento. (ECB/PIA7-Bohol)

Ubos sa bag-ong balaod nga RA 12309 (Free Funeral Service Act), ang gobyerno mohatag og standardized “indigent funeral package” sa mga pamilya nga anaa sa krisis. Kini naglakip sa pag-andam sa mga dokumento sa paglubong ug pag-embalsamar, paghatag og lungon o urn ug mga serbisyo sa pagsunog, paglubong, ug transportasyon. (ECB/PIA7-Bohol)