Mga aplikante sa amnestiy

Wala’y angay kahadlokan

TAGBILARAN CITY, Bohol (PIA)— Walay angay kahadlokan ang mga kanhi rebelde nga motahan sa ilang kaugalingon karon aron makaapas pa sa tanyag sa goberno nga amnestiya.

Kini maoy gipasalig ni Bohol Provincial Peace and Order Council (PPOC) Task Force Ending Local Communist Armed Conflict (ELCAC) focal person Romeo Teruel didto sa Kapihan sa PIA.

Kasagaran sa mga naglihok kanhi sa kalihukan ug namalik na nga nagpuyong malinawon human mapusa ang insurhensya sa Bohol, nagpanuko sa pagsurrender, sa kahadlok nga mahimo sila nga mabalikan tungos sa mga salaud nga ilang nahimo dihang aktibo pa sa kalihukan.

Apan, matud ni Teruel, sa pag-tahan lamang ug pagpanumpa og balik sa bandila sa Pilipinas sila mamahimong kwalipekado sa amnestiya.

Ang amnesty, usa ka tanyag sa us aka kagamhanan nga magpapas sa mga criminal liability sa mga salaud nga nahimo samtang didto pa sa kalihukan, basta ang nahisgutan nga mga salaud, political ang kinaiya o kadtong nahimo aron sa pagpa-asdang sa mga katuyuan sa politikanhong tinuohan.

Kini aron maaghat ang katawhan sa pagpahiuli, pagpasayloay ug dungan nga pag-abante ngadto na sa kaugmaran.

Sa higayon nga moduso ang kanhi rebelde sa application alang sa amnestiya, magpagawas ang NAC og safe conduct pass alang sa aplikante, ug kini magpugong na sa mga korte, tinugyanan ug mga opisyal sa pagpagawa sa mga warrant of arrests batok sa naghupot sa safe conduct pass, pasabut ni Teruel.

Ug samtang nagproseso pa ang Local Amnesty Board sa Bohol sa aplikasyon sa amnestiya, aron dili usab sila madakop, o kahimoan og legal operations, matud ni Teruel nga gitugotan na ang Bohol sa pag-isyo pinaagi ni Gobernador Erico Aristotle Aumentado sa pagpagawas sa provisional safe conduct pass sa sunod nga 15 ka adlaw.

Ang 15 ka adlaw nga adunay gihuptan nga provisional safe conduct pass ang aplikante, igo na kini aron makapagawas na usab ang NAC sa opisyal nag Safe Conduct Pass nga epektibo hangtud makagawas ang giaplayn nga amnestiya, panapos ni Teruel. (PIABOHOL)