PhilHealth nipasidaan sa publiko batok sa mga peke

nga website nga nagpaila nga opisyal online portal

TAGBILARAN CITY, Bohol (PIA)--Gipahimangnoan sa Philippine Health Insurance Corporation (PhilHealth) ang ilang mga miyembro nga magpabiling mabinantayon batok sa mga peke ug dili awtorisado nga mga website nga nagpaila nga opisyal nga online portal sa state health insurer.

Sa usa ka pahayag nga gipagawas sa Presidente ug Chief Executive Officer sa PhilHealth nga si Edwin Mercado, giingong daghang mga website ang nagsundog sa opisyal nga plataporma sa PhilHealth aron malimbongan ang mga tiggamit sa paghatag og sensitibo nga personal nga impormasyon.

Gi-awhag ni Mercado ang tanan nga magpabiling mabinantayon ug mosunod sa mga giya aron mailhan ang mga lehitimong plataporma.

Gipahinumdoman sa PhilHealth ang publiko nga ang bugtong opisyal nga website niini mao ang www.philhealth.gov.ph, diin ang mga lehitimong website sa gobyerno sa Pilipinas kasagarang matapos sa “.gov.ph.”

Gipasidan-an ang mga miyembro batok sa mga website gamit ang mga extension sama sa ".com" o ".net."

Nipasidaan usab ang state health insurer batok sa dili awtorisado o ubos nga kalidad nga mga bersyon sa logo sa PhilHealth, nga sagad gigamit sa mga scammer.

Gitambagan ang publiko nga i-verify ang branding pinaagi sa pagtandi niini sa mga opisyal nga buhatan sa PhilHealth ug verified social media pages.

Gipasiugda sa PhilHealth nga wala kini nangayo og direktang bayad, bank transfer, donasyon, o personal login credentials gawas sa opisyal nga PhilHealth Member Portal.

Gi-awhag ang mga miyembro nga dili i-click ang mga kadudahang link ug i-report ang mga malimbong nga website pinaagi sa opisyal nga Facebook page sa PhilHealth, pinaagi sa email sa actioncenter@philhealth.gov.ph, o pinaagi sa website niini.

Mahimo usab nga i-file ang mga report sa PhilHealth regional offices, sa Corporate Action Center sa (02) 8662-2588, o mobile hotlines 0998-8572957 / 0968-8654670 (Smart) ug 0917-1275987 / 0917-211 (Globe). (ECB/PIA7-Bohol)

Ang PhilHealth nagpagawas og dinaliang pahimangno sa tanan nga mga miyembro niini ug sa publiko bahin sa pagdagsang sa mga peke ug dili awtorisado nga mga website nga nag-angkon nga opisyal nga portal alang sa pagparehistro ug serbisyo sa miyembro. (PhilHealth/PIA)