2,959 tricycle drivers sa Tagbilaran City

nakadawat og 5K cash relief assistance

TAGBILARAN CITY, Bohol (PIA)--Mikabat sa 2,959 ka mga rehistradong traysikol drayber sa dakbayan ang nakadawat og cash relief assistance (CRA) niadtong Miyerkules, Abril 8, 2026, gikan sa Department of Social Welfare and Development (DSWD) isip hinabang sa nagkataas nga presyo sa gasolina.

Ang cash aid usa ka one-time grant isip tubag sa gobyerno aron makunhoran ang epekto sa bag-ohay nga pagtaas sa presyo sa lana nga nalambigit sa mga tensyon sa Middle East, nga nakadaot sa kita sa sektor sa transportasyon.

Ubos sa programa, ang matag drayber nakadawat og P5,000 pinaagi sa Assistance to Individuals in Crisis Situations (AICS), usa ka iskema sa gobyerno nga naghatag og emergency financial support.

Ang mga benepisyaryo, nga pulos rehistrado ubos sa Business Permits and Licensing Office (BPLO), nakadawat sa ayuda sa gitakda nga payout venues sa Tagbilaran City Central Elementary School, Ubujan Elementary School, ug San Isidro National High School.

Ang pag-apod-apod adunay duha ka iskedyul - gikan sa alas 6 sa buntag hangtod sa alas 12 sa udto, ug gikan sa ala 1 sa hapon. hangtod alas 5 sa hapon.

Aron masiguro ang hapsay ug episyente nga pagbayad, ang kagamhanan sa dakbayan sa Tagbilaran mipatuman ug digital queuing system nga gitumong sa pagpaminus sa taas nga linya ug pagpadali sa proseso.

Hinabang pinansyal sa naglisod nga mga drayber

Alang sa 71 anyos nga tricycle driver nga si Sergio Apayor, ang 5K nga cash assistance naghatag og hinabang pinansyal sa mga traysikol drayber nga sama niya nga nakigbisog sa krisis sa ekonomiya karon.

“Daku ko og pasalamat ani nga hinabang tungod kay magamit ni nako og pagpa-renew sa mayor’s permit sa akong tricycle unit,” matud pa ni Apayor.

Samtang si Arnold Baloncio, 40 anyos nga taga lungsod sa Dagohoy ug kasamtangang nagmaniho sa usa ka tricycle unit sa Tagbilaran City, nagpasalamat sa gobyerno sa cash relief assistance tungod kay dako kini nga tabang sa panginahanglanon sa iyang pamilya niining panahon sa krisis.

“Daku kaayo ko og pasalamat sa gobyerno ani nga ayuda. Makapalit nako ani og bugas para sa akong pamilya," paambit ni Baloncio.

Si Tagbilaran City Mayor Jane Yap, kinsa mipahibalo sa pagbayad niadtong Martes, miingon nga ang inisyatiba usa ka konkretong lakang aron matabangan ang mga drayber sa traysikol nga nagpadayon sa paghatag og importanteng serbisyo sa transportasyon bisan pa sa mga hagit sa ekonomiya.

Matud pa niini nga ang mga tricycle drivers mao ang backbone sa adlaw-adlaw nga pagbyahe.

Ang inisyatiba nagsuporta sa direktiba ni Presidente Ferdinand R. Marcos Jr., kinsa mideklarar og state of national energy emergency, ingon man ang memorandum circular nga gi-isyu ni DSWD Kalihim Rex Gatchalian isip tubag sa sitwasyon. (ECB/PIA7-Bohol)

Ang Social Welfare and Development (SWAD) Team Leader sa DSWD-7 sa Bohol nga si Lairisa Ballasa, nitunol sa P5,000 nga cash relief assistance (CRA) ngadto sa usa ka benepisyaryo nga traysikol drayber sa Tagbilaran City Central Elementary School niadtong Abril 8, 2026. Ang hinabang gituyo aron makatabang sa epekto sa pagsaka sa presyo sa lana, nga gimaneho sa nagpadayong krisis sa transportasyon sa Middle East. (ECB/PIA7-Bohol)