Gobyerno naglusad og mga subsidyo sa

transportasyon, diskwento sa pamasahe

TAGBILARAN CITY, Bohol (PIA)--Gipahibalo ni Presidente Ferdinand R. Marcos Jr. niadtong Huwebes nga ang gobyerno maglusad sa usa ka nationwide transport assistance package sugod Abril 15, lakip na ang subsidized nga pletehan ug mga diskwento sa gasolina, isip kabahin sa paningkamot nga makunhoran ang epekto sa pagsaka sa presyo sa lana.

Ang Presidente miingon nga ang mga lakang naglakip sa pagpatuman sa Department of Transportation (DOTr) Service Contracting Program, pagtanyag og bayad sa mga drayber ug operators og labing menos 20 porsiyento nga diskwento sa plitehan alang sa mga sumasakay, uban sa fuel subsidy alang sa mga public utility vehicles.

“Kaya naman simula April 15, ipapatupad ng DOTr ang Service Contracting Program. Sa ilalim ng programang ito, babayaran namin ang ating mga operator at driver ng mula P40 hanggang P100 kada kilometro. Dagdag ito sa kanilang kita mula sa pamasahe,” matud pa ni Marcos human sa tigom sa Unified Package for Livelihoods, Industry, Food, and Transport (UPLIFT) Committee.

Sa maong UPLIFT Committee nga tigom, gihisgotan ang pinakaulahing mga kalamboan sa Middle East ug pag-assess sa mga lakang sa gobyerno aron maminusan ang epekto niini sa nasud, ilabina ang padayon nga pagsaka sa presyo sa gasolina.

Alang sa mga sumasakay, ang Presidente miingon nga ang gobyerno mohatag og labing menos 20 porsiyento nga diskwento sa pletehan, uban sa mga ruta nga gidesinyo sa pagkonektar sa mga linya sa tren ug sa mga nag-unang bus corridors aron maseguro ang mas paspas, mas episyente, ug mas kasaligan nga pagbiyahe.

Ipatuman kini sa tibuok nasod ug maapil ang kapin o kulang sa 50,000 nga PUV, 1,000 operator ug mokabat sa 15 milyong pasahero.

Ang Service Contracting Program ipatuman sa off-peak hours aron masigurong may masakyan gihapon ang publiko bisan dili sa rush hour. Tanang moapil adunay GPS monitoring aron masiguro nga aktwal ang byahe ug maayo ang serbisyo.

Gawas niini, gipahibalo usab ni Marcos nga magpatuman usab og P10 matag litro nga tihap alang sa public utility vehicle nga adunay maximum nga 150 liters matag semana sulod sa tulo ka buwan. (ECB/PIA7-Bohol)

Ubos sa Service Contracting Program, bayran na sa gobyerno ang mga drayber ug operator dugang sa pletehan nga ilang kinitaan. Aduna usab minimum nga 20% nga diskwento sa plitehan sa mga sumasakay, ug ₱10 matag litro nga fuel subsidy alang sa mga PUV. Tumong niini nga mapadayon ang dagan sa pagbiyahe, maprotektahan ang kita, ug himuong barato ang pletehan sa daghang mga Pilipino. (PCO/PIA)