Aumentado mimandu sa mga LGUS

Pagsagop sa lakang pagdaginot

TAGBILARAN CITY, Bohol (PIA)—Gimandu na ni Gobernador Erico Aristotle Aumentado ngadto sa tanan nga local government units (LGUS), barangay ug mga kahugpungan sa mga komunidad sa pagpatuman sa mga lakang sa pagdaginot ilabi na sa mga kasaulogan sama sa Foundation Days ug uban pang mga pagsaddya ug pabibo, taliwa sa nagpadayon nga ekonomikanhong hagit.

Pinaagi sa Executive Order No 13, series of 2026, gilatag ni Gob Aumentado ang polisiya alang sa tanan nga kalungsuran, syudad, barangay ug mga kahugpungan nga anaa sa mga komunidad dinhi sa Bohol nga giaghat sa pagsagop sa mga lakang sa pagdaginot samtang nagplano sa mga Foundation Days, pista ug mga local nga kasaulogan.

Lakip sa mga natala nga lakang sa pagdaginot ang limitado nga paggasto labi na sa mga dili na kayo kinahanglan, apil na ang mga dayan-dayan, luho nga mga akomodasyon ug mahalon nga mga kalingawan, paglikay sa sobra ka gara nga mga kalihukan ilabi na niadtong dili na makatampo sa pagpatunhay sa kultura ug kapanulundan, kaayuhan sa komunidad ug malungtaron ng turismo.

Hinuon gisugyot sa gobernador ang paggamit sa local nga mga kahinguhaan ug local nga talent alang sa mas kunhod nga gasto.

Gimandu usab ang pagseguro sa dayag ug tataw nga pagpanubag sa mga tinugyanan sa mga galastohan nga may kalabutan sa mga napatuman nga kalihukan.

Labaw sa tanan, sugo sa gobernador nga ang tanan nga mga madaginot, ibubo ngadto sa gikinahanglang mga serbisyo sama sa kasanihan (health), edukasyon , seguridad sa pagkaon, pagpanalipod sa kalikopan ug pagpangandam batok sa katalagman.

Dugang pa, gidasonan ni Aumentado ang pagsuporta sa local nga panginabuhian, local nga pamuhunan ilabi na sa mga ginagmay nga mga tabo, pamaligya sa local nga mga produkto, kalihukang pangkultura ug turismo nga makapangawtahan sa katawhan.

Gipakadak-an usab sa gobernador segun sa iyang Executive Order and pagpaduso hinuon sa mas makahuloganon ug malungtaron nga kasaulogan, habig sa kultura ug nagapadayag sa mga pangindahay ug panglantaw sa lalawigan nga magseguro sa mga kalingawan apan menos sa galastohan.

Samtang gipadayag usab sa gobernador nga andam ang lalawigan manguna sa pagdaginop, kini wala usab magpul-ong sa atonomiya sa mga local nga kagamhanan kon dili nagpalantaw lamang usab sa us aka tumong: responsable ug tukma nga pagdumala sa panalapi samtang nag-agakay sa mga panginabuhian ug pamuhunan nga angay tabangan sa panahon sa krisis. (PIAbohol)

LEAD BY EXAMPLE. Sa panawagans a Kapitolyo ngadto sa mga LGUS sa pagdaginot, si Gob Erico Aristotle Aumentado, sa EO No 13, series of 2026 mipadayag nga andam ang Kapitolyo nga manguna sa pagdaginot, diha nga gikansela na niini ang liga sa basketball nga Governor’s Cup, ug uban pang gastoso nga mga kalihukan, nunot sa gikinahanglang paghugot bakus sa nagpadayong ekonomikanhong hagit. (PIABohol/PLGU FB Page)