“Inflation rate”

sa Marso: 4.5%

TAGBILARAN CITY, Bohol (PIA) –Mingsaka ngadto sa 4.5 porsyento ang namatikdang paglihok sa presyo dinhi sa Bohol sa 21 ka nag-unang paliton ug galastohan sa usa ka banay, kini maoy unod sa taho sa Philippine Statistics Authority (PSA) didto sa binuwan niini nga press conference sa ilang buhatan sa Galeria Luisa, dinhi sa syudad.

Ang paglihok sa presyo sa Marso, o mas nailhan nga inflation rate, 1.5 porsyento nga lapas sa inflation nga natala sa Pebrero nga diha pa sa 3.0 porsyento, dayag ni Jessamyne Anne Alaczaren, chief supervising statistician sa PSA Bohol.

Ang labing kusog nga bitad sa inflation mao ang diperensya sa tinuig nga paglihok sa presyo sa transport nga moabut sa 16.5 porsyento gikan sa 6.2 porsyento lamang sa milabay nga Pebrero.

Wala usab magpa-alkanse ang presyo sa pagkaon ug mga imnonon nga dili makahubog nga misaka gikan sa 3.2 porsyento ngadto na sa 3.7 porsyento sa Marso.

Namatikdan usan ang paglihok sa presyo sa biste ug pangsul-ob sa tiil, gikan sa 2.3 ngadto sa 3.3 porsyento sa Marso; pabalay, tubig, suga, gas ug uban pang ikasugnod gikan sa 1.8 porsyento ngadto sa 1.9 porsyento; imnonon nga makahubog ug tabako (gikan sa 3.7 porsyento ngadto sa 5.0 porsyento; mga kagamitan sa balay, appliances ug bili sa pagpaayo niini gikan sa 6.7 porsyento ngadto na sa 6.9 porsyento.

Matud sa PSA, ang nakahatag og tampo sa pagsibog sa presyo sa Marso mao ang transport nga mingpabulhot niini kay gikan sa 1.90 porsyento nga pahat sa galastohan, mi-kaon na sa 42.3 porsyento sa tigum sa banay.

Mingsunod usab ang pagkaon og imnonong dili makahubog nga kanhi mikuha sa 1.46 porsyento nga pahat apan karon may 32.5 porsyento na nga pahat.

Dugangan pa sa pabalay, bayad sa konsumo sa tubig, suga, gaas ug uban pang matag sa igsusugnod mga mingkuha sa 10.2 porsyento nga gikan sa 0.46 porsyento.

Ang pagsibog sa presyo, mahimong daku og kalabutan sa pagtaas sa presyo sa gasoline tungod sa nagpadayon nga krisis sa Middle East. (PIABohol)

EPEKTO SA MAHAL NGA GASOLINA. Segun sa mga datus sa gipanid-an nga mga presyo sa paliton, sa buwan sa Marso lamang, nanglugpot ang presyo sa mga nag-unang paliton, ug mas grabe ang nabati sa mga konsumidor sa transport, segun sa taho sa PSA pinaagi ni CSS Jessamyne Anne Alcazaren. (PIAbohol)