PhilSys registration nagpadayon sa

PSA Galeria Luisa, mga kalungsoran

TAGBILARAN CITY, Bohol (PSA) –Alang sa mga buot makakuha sa ilang mga kopya sa national ID system o mas opisyal nga gitawag nga Philippine ID system (PhilSys), adunay pito ka teams nga may tukmang ID processing kits ang karon nagpadayon sa pagpangproseso sa ID.

Sa pito ka teams, duha niini anaa sa ikatulong andana sa Galeria Luisa sa lobby mismo sa buhatan sa PSA samatang ang pito ka mga teams, anaa sa mga kalungsuran sa Buenavista, Getafe, Garcia Hernandez, Cortes ug sa San Miguel, matud ni PSA Bohol Chief Supervising Specialist Jessamyne Anne Alcazaren.

Gitaho sa PSA nga sukad sa unang semana sa Abril, mingdagsang ang mga tawo nga magparehistro sa ilang buhatan sa Galeria Luisa, dungan usab sa nagpadayon nga bansay nga ang national ID na maoy gigamit nga primary ID alang sa pagkuha sa mga ayuda ug hinabang sa goberno.

Kahinumduman nga nalangan ang pagpahipno sa National ID system diha nga gibalhin na ang pagpa-imprinta sa mga ID cards gikan sa us aka ahensya sa goberno, ug karon anaa na sa PSA.

Sa kasamtangan, apil usab sa nakapadaghan sa moparehistro, gawas nga mao na ang gigamit nga primary cards sa pagclaim sa ayuda, labi na niining panahon sa ekonomikanhong kalisud.

Gawas sa prayoridad nga senior citizens, persons with disabilities, indigents, giapil na usab karon sa national ID system ang mga kabataan.

Nunot niini, mahimo nga alang sa mga dili na makahuwat pa, bukas pa gihapon ang PSA alang sa pagproseso sa IDs nga karon, anaa pa sa papel.

Sa laing bahin, aron mamenosan ang bul-og sa katawhan nga mingpila sa PSA, aghat sa mga tinugyanan nga kon mahimo, adto na sa mga PSA registration teams nga anaa sa kalungsuran, aron dili na kayo maghuot ang pangrehistro sa Tagbilaran.

Matud ni Alcazaren, ang PSA PhilSys team naa sa munisipyo ug mga kabarangayan sa Getafe gikan sa Abril 8-18, sa Garcia hernandez sa Office of the Senior Citizens Association samtang molibut usab ang team sa mga kabalayan sa mga dili na makasugakod og lakaw pagparehistro.

Sa Cortes, ang PSA team mahimong igkita sa Munisipyo ug mga barangay Hall sa Abril 8-22, samtang sa San Miguel Gym, ang PSA anaa sa San Miguel Gymnasium Abril 8-18 ug sa Buenavista sa Municipal Hall sa Abril 8-18. (PIABohol)

ADTO SA MGA KALUNGSURAN. Inay moari sa Tagbilaran diin naghan-ok ang daghang buot magparehistro sa Philippine ID, mibutyag ang PSA nga may teams sila nga nagrehistro usab sa Getafe, Cortes, Garcia Hernandez, Buenavista ug San Miguel. (PIABohol)