BIR nagpagawas sa updated nga listahan

sa 2,263 ka VAT-exempt nga mga tambal

TAGBILARAN CITY, Bohol (PIA)--Gipalapdan sa Bureau of Internal Revenue (BIR) ang listahan sa mga tambal nga wala masakop sa value-added tax (VAT), nga niabot na sa 2,263.

Ang BIR ni-isyu sa Revenue Memorandum Circular (RMC) No. 27-2026 niadtong Abril 8, 2026, nga nagmantala sa gi-endorso sa FDA nga tibuok listahan sa VAT-exempt nga mga tambal ubos sa Republic Act No. 10963, o ang TRAIN Law, ug ang Republic Act No. 11534, o ang CREATE Act.

Gi-endorso sa Food and Drug Administration Philippines (FDA) sa Department of Health (DOH) ang updated nga listahan sa 2,263 ka VAT-exempt nga mga tambal alang sa pagtambal sa mosunod nga mga sakit: 702 alang sa cancer, 535 alang sa hypertension, 327 alang sa diabetes, 300 alang sa sakit sa pangisip, 171 alang sa taas nga kolesterol, 152 alang sa sakit sa kidney, ug 76 alang sa tuberculosis.

Subay sa direktiba ni Presidente Ferdinand R. Marcos Jr. nga himoong mas dali ug barato ang pag-atiman sa panglawas sa mga Pilipino, ang Department of Finance (DOF), ubos ni Finance Secretary Frederick D. Go, nagsuporta sa tukma sa panahon nga pagpatuman sa mga lakang nga makatabang sa pagpakunhod sa gasto sa mga importanteng tambal.

Samtang si BIR Commissioner Charlito Martin R. Mendoza miingon nga kini nga pag-isyu kabahin sa padayong paningkamot sa gobyerno nga makatabang sa pagpagaan sa gasto sa mga importanteng tambal, ilabi na sa mga Pilipino nga nagdumala sa mga sakit nga malala ug kritikal.

Ang RMC No. 27-2026 dugang naghatag nga ang updated nga listahan mopuli sa miaging revenue memorandum circulars nga gi-isyu sa maong butang ug magpabilin nga epektibo hangtud nga ang mga bag-ong update ma-endorso sa FDA. (ECB/PIA7-Bohol)

Sa Revenue Memorandum Circular nga gipagawas niadtong Abril 8, ang BIR niingon nga ang mga cancer patients ang makabenepisyo sa kadaghanan, diin 702 ka mga tambal ang sakop na sa VAT exemption program. (BIR/PIA)