Excise taxes sa LPG, kerosene gisuspenso

aron maibanan ang epekto sa krisis sa lana

TAGBILARAN CITY, Bohol (PIA)--Gipahibalo ni Presidente Ferdinand R. Marcos Jr. ang pagsuspenso sa excise taxes sa LPG ug kerosene isip kabahin sa mga lakang sa gobyerno aron mamenosan ang epekto sa krisis sa lana.

Ubos sa maong direktiba, ang presyo sa LPG mous-os og P3.36 matag kilo o hapit P37.00 matag tangke, samtang ang presyo sa kerosene mous-os og P5.65 matag litro aron maminusan ang gasto sa pagluto ug ubang kinahanglanon.

Gawas sa pagkunhod sa buhis, ang Presidente nipasalig nga ang presyo sa mga nag-unang palaliton sama sa sardinas, pan, instant noodles, ug gatas magpabiling stable hangtod sa katapusan sa Abril.

Gitangtang na usab ang bayronon sa mga fishport ug gipaminusan usab ang terminal fees sa mga pantalan sa mga sakyanan nga nagdala sa mga produkto sa agrikultura aron mapugngan ang pagsaka sa presyo sa pagkaon sa mga merkado.

Gitumbok sa Presidente nga mas gipili sa administrasyon ang pagmentinar sa VAT sa mga produktong petrolyo aron adunay igong pondo alang sa subsidyo ug mga benepisyo sa salapi alang sa tanang sektor, dili lamang sa transportasyon.

Matud pa sa Presidente, ang koleksyon gikan sa VAT gamiton sa pagpundo sa mga programa alang sa mga mag-uuma, senior citizens, PWDs, ug single parent pinaagi sa pagpalapad sa “Bentang Bigas” program ug uban pang hinabang.

Gihatagan og gibug-aton ni Presidente Marcos nga kini nga mga lakang kabahin sa pagbalanse sa komplikado nga sistema sa ekonomiya aron mapanalipdan ang mga konsumidor samtang gisiguro nga ang mga lokal nga prodyuser dili makasinati sa mga kapildihan.

Gipasalig sa Malacañang nga padayong tun-an ang tanang opsyon ug dili mohunong ang gobyerno hangtod nga ang matag Pilipino mobati og tinuod nga kaharuhay sa ilang inadlaw-adlaw nga kinabuhi. (ECB/PIA7-Bohol)

Gi-anunsyo ni Presidente Ferdinand R. Marcos Jr., niadtong Abril 13, ang pag-us-os sa excise tax sa mga produktong petrolyo, subay sa Republic Act No. 12316 nga naghatag og gahom sa Presidente sa pagpatuman niini aron mapagaan ang gasto sa mga Pilipino taliwala sa pagsaka sa presyo sa lana tungod sa tensiyon sa Middle East. (PIA)