P5K cash relief assistance alang

sa tricycle drivers sa Tagbilaran

TAGBILARAN CITY, Bohol (PIA)—makadawat og tag P5 mil ang kinatibuk-ang 2959 nga mga rehistradong tricycle drivers sa Tagbilaran City Abril 8, isip cash relief assistance (CRA) sa nagpadayon nga pagmahal sa gasoline.

Sa pahibaw ni City Maypor Jane Yap sa iyang opisyal nga facebook page, gipatin-aw sa city mayor nga kadto lamang mga tricycle drivers nga rehistrado sa Business Processing and Licensing Office sa syudad ang makadawat sa hinabang sa kagamhanan.

Kini nga tabang ug konkretong aksyon para suportahan ang atong mga drivers nga padayon nag serbisyo sa atong syudad bisan sa kalisod, saysay ni Mayor Jane Yap.

Dugang ni Mayor Yap, ang mga drayber, ang backbone sa atong adlaw-adlaw nga biyahe.

Ang nasudnong kagamhanan, pinaagi sa Department of Social Welfare and Development nagtagana og pundo alang sa CRA), often pinaagi sa iyang programa sa Assistance to Individuals in Crisis Situations (AICS).

Ang nahisgutang programa nagtumong sa mga sector nga mas grabeng naapektohan sa crisis sama sa public utility vehicle (PUV) ug tricycle drivers nga nagsagubang sa ekonomikanhong paglisud.

Matud sa mayor, aron malikayan ang paghuot ug pagpunsisok sa mga drivers, tulo ka lugar ang gitumbok sa syudad nga himoan sa payout gikan sa alas 6:00 ngadto sa alas 12:00 sa udto ug ala 1:00 ngadto sa alas 5:00 sa hapon.

Kini nga mga payout pagahimoon sa San Isidro Elementary School, Ubujan Elementary School ug sa City Central School, sa nahisgutan nga mga oras.

Aron kalikayan pa gayud ang masayang nga oras, usa ka digital queuing system ang gisagop sa syudad alang niining kalihukan.

Kini matud pa, aron malikayan ang taas nga linya ug magpabiling organisado ang payout. Mas paspas, mas klaro, mas sayon para sa tanan, matud sa mayor.

Matud pa sa DSWD, kinahanglan usab dad-on ug ipakita ang valid Original Driver’s License ID ug usa (1) ka photocopy niini, ug gigurohon nga nagtugma ang ngalan sa listahan ug sa lisensya.

Kung wala sa listahan: moadto sa DSWD-LGU Help Desk nga nahimutang sa payout venues aron makapangutana og dugang nga impormasyon.

Alang sa mga tricycle driver, subaya ang LINK: https://stratcom.tagbilaran.gov.ph/o buksi ang Facebook ni Mayor Jane Yap alang sa link ug Makita ang oras kanus-a pwede mopila alang sa CRA.

TEMPORARYONG ABAG. Gipadayag sa DSWD ug sa kagamhanan sa syudad sa Tagbilaran nga manghatag ang kagamhanan og tag P5mil agi og abag sa kalisud nga gipas-an sa mga tricycle drivers sa kalit nga pagmahal sa gasoline ug igtutubil. Ang pay-out adto himoon sa tulo ka ligar: City Central, San Isidro ug sa Ubujan Elementary schools, matud ni Mayor Jane Yap. (PIABohol)