GSIS Relief assistance nga dili pugos:

May refund sa 3 buwan nga

loan payments abag sa krisis

TAGBILARAN CITY, Bohol (PIA)—Aron makahatag og dyutay nga alibyo sa mga sakop ug trabahante sa goberno nga nagsagubang sa ekonomikanhong kalisud dala sa krisis, ipatuman sa Government Service Insurance System (GSIS) ang Balik Ginhawa Program.

Niini nga programa, inay mohatag og tulo ka buwan nga moratorium sa mga loans sa mga empleyado, ang Balik Ginhawa maghatag og tabang sa mga empleyado pinaagi sa refund mechanism, nga magtugot sa mga sakop nga makadawat sa katumbas sa tulo ka buwan nga bayad sa loans, sa usa ka lump sum.

Sahi sa kasagaran nga loan moratorium diin ang mga sakop dili una pabayron sa ilang mga loans, kining Balik Ginhawa, magrefund sa tulo ka buwan nga nabayad na, matud sa GSIS.

Apil sa madawat nga lump sum ang loan amortizations sa Disyembre 2025 ngadto sa Pebrero 2026, nga madawat sa mga membro direkta sa ilang mga accounts sa GSIS.

Ang isiyatiba nagsuporta sa mas lapad nga whole-of-government approach sa goberno ubos sa Unified Package for Livelihoods, Industry, Food, and Transport (UPLIFT) program, nga nagtumong sa pagpagaan sa epekto sa nagpadayong pagsaka sa bili sa mga paliton.

Pinaagi niini, natuo ang GSIS nga ang mga sakop niini, makahupot sa mahinungdanon nga kantidad nga ilang magamit alang sa personal ug mga dinalian nga panginahanglan sa panimalay, kon itandi sa ginagmay nga matigum kon ang loan moratorium nga sistema sa matag buwan nga suspenso sa bayronon ang himoon.

Hinuon, gipasabut usab sa GSIS nga dili pugos ang pag-avail sa Balik Ginhawa.

Kadtong mga sakop nga buot moapil, mahimo na nga mo-applya sa GSIS Touch mobile application, ug kon maparobahan na ang aplikasyon, masulod na dayon sa personal account sa membro ang tabang, nga walay interes o silot.

Matud ni GSIS President ug General Manager Wick Veloso, ang Balik Ginhawa gidesinyo aron makahatag og dinalia-n ug mahinungdanon nga hinabang sa mga empleyado nga sakop, samtang magpanalipod usab sa interes sa mga trabahante.

Dugang sa GSISI pinaani ni Veloso, sa sistema, magpadayubn pa gihapon ang pagkaltas sa sweldo isip amortization aron maseguro nga lig-on pa gihapon ang pundo sa GSIS ug padayonon ang kaayohan alang sa mga sakop niini. (PIABohol)