Cortes nagduga’g pundo para

sa 3500 ka rice subsidy packs

TAGBILARAN CITY Bohol (PIA)—Dyutay nga pasensya, alang sa 3,593 ka mga banay nga nasukip sa lista sa mga barangay nga nanginahanglan sa tag 10 ka kilo nga bugas, isip hinabang.

Kini human gipasalig sa local nga kagamhanan sa Cortes nga mogamit sa kaugalingon nga pundo ang lungsod aron maapod ang nahibilin sa 4,750 ka mga banay nga wala na maabut sa bugas gikan sa Kagamhanang Probinsyal, ubos sa mandu ni Gobernador Erico Aristotle Aumentado.

Una pa nga gimandu sa mayor sa Cortes ngadto sa mga tinugyanan sa mga barangay sa lungsod nga mag-andam sa listahan alang sa mga banay nga angayan nga ma-abagan sa tag 10 ka kilo nga bugas, agi og alibyo niining panahon sa kalisud.

Mikabat sa 4,750 ka mga banay sa 14 ka barangay sa Cortes and nalista, apan 1,175 lamang ka mga banay ang napahatan sa Kagamhanan sa lalawigan, matud pa sa mayor.

1,157 households lamang ang gi-allot sa Probinsya bisan pa nga kita adunay kapin 4,750 ka panimalay gikan sa 14 ka mga barangay. Tungod niini, dili gyud malikayan nga adunay uban nga wala pa makadawat sa unang distribution sa rice subsidy, dayag sa mayor.

Niini, gipasabut ni Mayor Uy nga dili angay masubo ug mahisagmuyo ang wala makadawat sa rice subsidy sa unang hugna sa p[agpanghatag.

Ang inyong Lgu-Cortes nagplano nga pun-an ang mga wala maapil pinaagi sa kaugalingong pondo sa atong Lungsod aron tanan patas ug walay mabiyaan, pasalig sa mayor.

Gitaho sa mayor nga nagpadayon na ang proseso sa procurement ug pagkompleto sa tanang requirements sa pagpalit sa dugang bugas aron makuha ug mahatag kini sa labing dali nga panahon.

Niini, mihangyo usab ang lungsod sa gamayng pagsabot ug paghulat, samtang ilang gipaslig nga ang administrasyon nagsunod pirmi sa prinsipyo nga “Walay pili-pili, patas para sa tanan.”

Alang sa ubang kalungsuran nga nagpangaykay pa sa dugang pundo aron maka-hatag usab sa dugang abag ngadto sa mga banay nga apektado sa ekonomikanhong krisis, naka bentaha ang Cortes.

Tungod sa mas agresibo nga kampanya alang sa pagpangita og dugang pundo, pinaagi sa Revenue Generation program sa lungsod, nakuha sa lungsod ang may maayong pinansyal nga kahimtang.

Gani, apil sa 27 ka mga lungsod ug mga mayor, ang Cortes ug si Mayor Rod Uy nakadawat og pasidungog gikan sa Provincial Government, Provincial Treasurer’s Office (PTO), ug Bohol Municipal Treasurers League (BOMUNTREAL), lakip na ang Bohol Assessors League, kay apil kini sa top-performing local government units.

Didto sa LGU Bohol Awards 2026 didto sa Bohol Tropics Resort, sa mi-aging semana, si Mayor Uy, kuban ang 26 ka mayor, mga mamahandi sa lungsod ug 25 ka mga assessors, gipasidunggan sa ilang outstanding performance sa real property tax collection efficiency ug sa mga kabag-ohan nga gipatuman nga mingresulta sa pagsaka sa nakolekto nga pundo gikan sa buhis sa Fiscal Year 2025.

Matud ni Gob Aumentado, kini nga pagpasidungog aron pagpadayag sa importante nga gimbuhaton sa epektibong local revenue generation sa pagpalahutay sa mga programa ug serbisyo publiko sa kalungsuran.

Kini nga pag-ila sa mga kalungsuran, nagpadayag lamang sa diwa sa integrity, accountability, ug dedication sa public service, matud sa gobernador. (PIABohol)