59% sa mapatubigan nga mga

Humayan, madaut sa ‘El Nino’

TAGBILARAN CITY Bohol (PIA)— Kinatibuk-an nga 59% sa mga kahumayan nga gialagaran sa National Irrigation Administration (NIA)-7 dinhi sa Bohol ang mahimong apektado sa gipanagna nga panahon sa tinghuwaw nga magsugod sa Hunyo.

Kini maoy gipaambit nga kasayuran gikan sa NIA pinaagi ni irrigation development officer Gerard Odtohan, atul sa labing una nga tigum sa gipabuhi nga Provincial El Nino Task Force, sa mi-aging semana.

Ang NIA maoy ahensya sa kagamhanan nga nagdumala sa pagpadagan sa patubig sa mga kabasakan diin may wala kini ka mga dinagkong pasilidad sa patubig (National Irrigation System (NIS), samtang nag-abag usab sa pagpadagan sa mga ginagmay nga pasilidad sa Community Irrigation Systems (CIS).

Sa NIS nga naglangkob sa Malinao Irrigation System (IS), Bayongan IS, Capayas IS, Benliw Small Reservoir Irrigation System (SRIS), Talibon SRIS, Ilaya SRIS, Tugas-Can-olin SRIS ug Tubigon SRIS, may kinatibuk-an kini nga 14,765 ka ektaryas diin katunga niini gitamnan sa humay ug kapin sa us aka libo ka ektaryas nga gitamnan sa mga high value commecrcial crops, mga 56 porsyento niini ang mahimong maapektohan sa taas nga lanat sa kainint.

Sa CIS, sa kinatibuk-an nga 7.,000 ektaryas diin 4,700 ektaryas niini gigamit isip humayan, matud sa NIA, mahimong 68 porsyento niini ang mahimong apektado sa huwaw.

Sa kinatibuk-an, sa 21 mil ka ektaryas nga unta magamit sa panghumayan, 66 porsyento niinin ang mahimong mangadaut sa huwaw, segun sa PAG-SA.

Tungod niini, mahimong 25 ka mga kahugpungan sa mga irrigators ang mamahimong apektado sa ting-init nga gibanabana nga motikang pa ngadto sa unang tulo ka buwan sa 2027.

Kini usab nagpasabut nga sa datus gikan sa NIA, mokabat sa 16,891 ka mga mag-uuma ang mahimong maapektohan niini. (PIABohol)

SOBRA SA KATUNGA. Kon magpadayon ang huwaw nga dala sa El Nino, kapin sa katunga ang produksyon sa humay sa Bohol ang ma-apektohan, subay sa taho sa NIA pinaagi ni irrigation development officer Gerard Odtohan. Kini usab mahimong mas mopalisud pa sa kahimtang sa katawhan, nga karon nagping-it na sa krisis. (PIAbohol)