Modernisasyon sa PAG-ASA maoy

Rason sa tugma nga pagbanabana

TAGBILARAN CITY, Bohol (PIA)—Tungod sa pagpamoderno sa mga kahimanan sa pagbanabana sa panahon subay sa makuha nga mga datus, kini maoy gitumbok nga hinungdan nga tugma na ang mga ikapagawas nga panglantaw sa dagan sa panahon sa weather bureau dinhi sa Bohol.

Didto sa Kapihan sa PIA, gibutyag ni Philippine Atmospheric Geophysical and Astronomical Services Administration (PAG-ASA) Bohol weather forecaster Leonardo Samar, nga sa pagkabarug sa Doppler Radar sa Alburquerque, nakompleto ang kapasidad sa PAG-ASA Bohol nga makahatag sa tugma nga banabana sa kahimtang sa pananhon.

Ang Alburquerque Doppler Radar Station may maabut nga effective radius nga molanat sa 400 kilometros ug niini nga kalapdon, nagsaylo na kini sa mga susamang radar stations sa Samar, Cebu ug sa Hinatu-an Surigao.

Niini, ang Doppler radar makadetect sa pag-usab usab sa panahon pinaagi sa paglabay sa mga microwave frequencies samtang paminawon niini ang pagbalik sa gilabay nga signal.

Matud ni Samar, labing epektibo ang Doppler radar sa kalayoon nga 200 ngadto sa 230 kilometros diin kaya niini nga mahatag ang kakusogon sa uwan, dagway sa bagyo apil na ang lanat sa kabag-on sa panganod nga makapauwan.

Gikan sa Alburquerque radar station, kaya sa nahisgutang pasilidad ang pagsuhid sa panahon uibabaw sa kinatibuk-ang Bohol, lakip na ang kadagatan nga nagpalinot niini, matud sa PAG-ASA.

Gawas sa Doppler Radar sa PAG-ASA sa Alburquerque, may mga synoptic weather stations usab ang ahensya didto sa Panglao Inter national Airport, sa Biking sa Dauis ug sa Anda Bohol, mga pasilidad nga maghatag sa mas tukma nga hulagway sa dagan sa panahon.

Tungod niining mga moderno nga kahimanan, ubanan usab s amga automated weather stations nga gipabarug sa goberno, mas tataw na sa PAG-ASA ang paghatag sa hulagway sa panahon, labi na sa inadlaw nga uwan ug mga naghulga nga dautang panahon. (PIAbohol)

MAS DAGHANG MODERNONG EKIPO. Dala sa mas daghang ekipo karon kon itandi kaniadto, kaya na sa PAG-ASA ang paghatag sa mas haum nga banabana sa panahon, ug kaya na niini matumbok diin nga mga dapit ang may uwan, pagpanugdog ug pagpangilat, aron mas makabantay ang mga komunidad, matud ni weather forecaster Leonardo Samar (PIAbohol)