Konsultasyon alang sa pagbuhi

Sa ABENA, gihimo didto sa DILG

TAGBILARAN CITY Bohol (PIA)— Human sa usa ka dekada, may timailhan na nga buhi-on pag-usab ang kahugpungan sa mga hepe sa mga nasudnong ahensya dinhi sa Bohol.

Kini human nagpatawag ang Department of Interior and Local Government Bohol pinaagi ni Provincial Director Johnjoan Mende sa usa ka consultative conference sa mga ahensya nga buot magpasakop sa gilaraw nga buhi-on nga Association of Bohol Executives of National Agencies (ABENA).

Didto sa konsultasyon, gipalapad sa DILG ang mga katuyuan nga naglakip sa mas dali nga koordinasyon, mas paspas nga pagpadagan sa mga programa ug ang pagtinabangay nagdto sa usa ka katuyuan: ang mag-alagad sa mga katawhan sa mga nagkadaiyang mandatos sa mga buhatan.

Ang ABENA us aka coordination ug collaborative body sa mga sakop nga nasudnong ahensya nga ania sa Bohol aronm mas mahiusa sa mga programa sa pag-ugmad, pagpangalagad ug pagsagubang sa mga hagit sama sa emergency response.

Pinaagi sa ABENA, mahimong ikatugma na ang mga nasudnong programa sa mga prayoridad sa lalawigan ug kalungsuran, magtinabangay sa lalawigan ug kalungsuran ilabi na sa pag-ambitay sa mga kasayuran, programa ug buhat pangkaugmaran.

Sa kasamtangan, nanawagan ang DILG, kinsa mao una ang mobarug nga pangulo hangtud nga makapili na sa mga bag-ong opisyales, ngadto sa mga ahensya nga makigsabot aron masukip sa membership, samtang gilaraw nga sa Hunyo, maghimo na sa labing unang opisyal nga tigum niini. (PIAbohol)

SINUGDANAN SA PAGHUGPONG. Gihimo sa DILG ang konsultasyon sa mga hepe sa mnga ahensya sa nasudnong kagamhanan aron hukman kon angay pa ba buhion ang ABENA. Sa maong lakang, mas mapadali, mas mahiusa ug mas makadaginot ang mga ahensya sa pagpatuman sa mga proyekyo tungod sa tinabangay. (PIAbohol)