SAYO NGA PAGPANANUM

Mayo 18, NIA magsugod pa-agas

sa patubig gikan sa mga dams

TAGBILARAN CITY Bohol (PIA)— Mayo 18 sugdan na ang pagpa-awas sa mga dams sa Bohol aron mas sayo nga makasugod ang pagpananum samtang may ginagmay pang uwan.

Kini maoy nahukman sa National Irrigation Administration (NIA) samtang gipadayag na Philippine Atmospheric Geophysical and Astronomical Services Administration (PAG-ASA) ang El Nino Alert, sugod Abril 22.

Ang El Nino, usa ka panghitabo diin mag pagsaka ang temperature sa dagat sa kasubangan nga Pasipiko, ug magpahinay sa hingin nga mao unta ang mopabugnaw niini, hinungdan sa mas dyutay nga kahigayunan sa pagmugna og panganod nga makapa-uwan.

Sa Bohol, ang kakuwangon sa uwan, maghatag og suliran sa mga mag-uuma nga nagsalig sa sawod sa uwan, samtang magpakibra usab sa tubig nga natigum sa mga dagkong dams nga gigamit aron magpatubig sa mga basakan.

Gani, butyag sa mga tinugyanan sa NIA-7, may tulo ka mga Small Reservoir Irrigation Projects (SRIP) sa Bohol ang nameligro nga ang serbisyo sa pagpatubig, dili makalahutay sa tibuok tingtanum.

Matud ni Engr. Evaristo Borja, engineering and construction operations chief sa NIA-7, mahimong dili makahatag sa gidesinyo nga serbisyo ang Ilijan SRIP sa Tubigon, ang Ilaya SRIP sa Ubay ug ang Can-olin SRIP sa Candijay.

Apan gipasalig sa NIA nga giyahan niini ang mga irrigators association nga makapatubig nga maayohon ug dumala ang tubig samtang gitambagan na ang mga umahan nga dili na maabut sa tubig, sa pagpanum sa high value commercial crops (HVCC) nga dili na kayto magkinahanglan sa tubig, aron may maani ug mapupo pa gihapon.

Ang mga ahensya sa kagamhanan nga nag-abag sa mga mag-uuma, may mga tinubdan usab sa mga liso nga mahimong mapangayo, alang sa mga mag-uuma nga dili na maabut pa sa tubig gikan sa mga dams ug SRIPS, matud sa NIA. (PIABohol)