Sea-based service contracting program 

nga ‘LAYAG’ gilusad sa DOTr

TAGBILARAN CITY, Bohol (PIA)—Gilusad sa Department of Transportation (DOTr) niadtong Lunes ang sea-based service contracting program nga maghatag og subsidyo sa pletehan sa mga partisipanteng operators ug mga barko.

Kini agi og pagsunod sa mando ni Presidente Ferdinand R. Marcos Jr. nga hatagan og tabang ang mga shipping companies ug mga pasahero sa barko taliwala sa giatubang nga global oil crisis.

Gitawag nga "Lakbay Alalay ng Gobyerno" o LAYAG program, ang inisyatiba nagtumong sa pagtabang sa mga kompanya sa barko ug mga pasahero sa lantsa pinaagi sa paghatag og subsidyo sa 11 ka high-demand, short-trip nga mga ruta nga apektado sa pagsaka sa plitehan.

Uban sa budget nga P200 milyones, ang programa mahimong maghatag sa mga pasahero og diskwento sa pletehan nga hangtod sa P195, depende sa ruta sa lantsa, nga makabenepisyo sa gibanabana nga 1.16 milyones ka mga pasahero matag adlaw sulod sa 12 ka adlaw, matud pa sa DOTr.

Ang subsidy kwentahon base sa aktuwal nga gidaghanon sa pasahero matag byahe ug gi-aprobahan nga mga kalainan sa pamasahe ubos sa mga regulasyon sa Maritime Industry Authority Administrator (MARINA), pagsiguro nga ang mga pasahero magpadayon sa pagbayad lamang sa pre-increase base fare samtang ang mga operator mabayran pinaagi sa suporta sa gobyerno.

Gi-implementar ubos sa Republic Act No. 12314 (FY 2026 General Appropriations Act) ug DOTr Department Order No. 2026-008, ang programa nagpakita sa tibuok-kalibotang paningkamot sa gobyerno aron mapanalipdan ang mga pasahero ug ang pagpadayon sa mga serbisyo sa maritime taliwala sa pangkalibutanon nga pagpit-os sa ekonomiya.

Si Senior Undersecretary for Road Transport and Infrastructure Mark Steven Pastor miingon nga ang mga shipping lines makahimo sa pagpadayon sa pagmentinar sa inter-island connectivity, ilabi na sa mga pasahero nga naningkamot nga makadaginot sa gasto sa transportasyon.

Samtang si MARINA Administrator Sonia Malaluan, sa iyang bahin, nipadayag og paglaum nga ang programa makapagaan sa palas-anon sa matag adlaw nga mga sumasakay, ilabi na nga ang maritime sector nagpabilin nga usa sa mga industriya nga labing naigo sa krisis sa lana. (ECB/PIA7-Bohol)

Gibana-banang 10 ka milyon nga mga pasahero sa dagat ang gitakdang makabenepisyo gikan sa subsidyo sa pletehan sa gobyerno sa paglusad sa Lakbay Alalay ng Gobyerno o LAYAG Program niadtong Mayo 25, 2026. (MARINA/PIA)