1,007 ka brgy sa Bohol nakakuha’g ‘highly functional’

nga rating sa 2026 anti-drug assessment

TAGBILARAN CITY, Bohol (PIA)—Kinatibuk-ang 1,007 ka barangay sa tibuok lalawigan Bohol ang giila sa malampusong pagtuman sa 2026 Barangay Anti-Drug Abuse Council (BADAC) Functionality Assessment, nga nagpasiugda sa padayong paningkamot sa probinsiya sa pagpalig-on sa mga grassroots anti-drug programs ug pagpalambo sa mas luwas nga mga komunidad.

Ang maong pag-ila gi-anunsyo sa Department of the Interior and Local Government (DILG)-Bohol Province pinaagi sa post sa opisyal nga Facebook page niini niadtong Hunyo 17, 2026.

Ang tinuig nga assessment nag-evaluate sa ka-epektibo sa mga barangay sa pagpatuman sa community-based anti-drug initiatives, lakip na ang drug prevention campaigns, rehabilitation support programs, advocacy activities, ug mga lakang nga gitumong sa pagpatunhay sa kalinaw ug kahusay.

Matud pa sa DILG-Bohol, ang maong mga barangay nagpakita og maayong liderato, aktibo nga partisipasyon sa mga sakop sa komunidad, padayon nga pagsunod sa mga polisiya sa pagsumpo batok sa ilegal nga droga. Gipasiugda usab sa assessment ang mahinungdanong tahas sa mga lokal nga gobyerno sa pag-uswag sa mga paningkamot batok sa droga sa grassroots level.

Gidayeg sa departamento ang mga opisyal sa barangay, mga sakop sa BADAC, mga kaubang ahensya, ug nagkalain-laing stakeholders kansang kolaborasyon nakatampo sa malampusong pagpatuman sa mga programa batok sa ilegal nga droga sa ilang tagsa-tagsa ka komunidad.

Lakip sa mga lungsod ug syudad nga adunay barangay nga nakadawat sa Highly Functional rating mao ang Alburquerque, Alicia, Anda, Antequera, Baclayon, Balilihan, Batuan, Bien Unido, Bilar, Buenavista, Calape, Candijay, Carmen, Catigbian, Clarin, Corella, Cortes, Dagohoy, Danao, Dauis, Dimiao, Duero, Garcia Hernandez, Guindulman, Inabanga, Jagna, Getafe, Lila, Loay, Loboc, Loon, Mabini, Maribojoc, Panglao, Pilar, President Carlos P. Garcia, Sagbayan, San Isidro, San Miguel, Sevilla, Sierra Bullones, Sikatuna, Tagbilaran City, Talibon, Trinidad, Tubigon, Ubay, ug Valencia.

Lakip sa mga local government units nga adunay labing daghan nga highly functional barangays mao ang Inabanga nga adunay 50 ka barangay, Loon-47, Maribojoc ug Presidente Carlos P. Garcia-22 matag usa, Jagna-34, Balilihan-33, Valencia-33, Calape-32, Garcia Hernandez-31, ug Carmen-28.

Ang DILG-Bohol mipadayag og paglaum nga ang pag-ila makadasig sa tanang barangay sa pagpadayon ug pagpalig-on pa sa ilang kampanya batok sa droga, pagsiguro nga ang mga komunidad magpabiling protektado gikan sa makadaot nga epekto sa ilegal nga drugas. (ECB/PIA-7 Bohol)

Ang BADAC Functionality Assessment sa Department of the Interior and Local Government (DILG), nagsilbi nga importanteng mekanismo sa pagsukod sa performance sa lokal nga anti-drug councils ug pagsiguro nga ang mga anti-illegal drug programs magpabiling aktibo, responsive, ug community-driven. (ECB/PIA-7 Bohol)