BPIA mingtigum sa tourism

workers paghimo’g lakang

batok sa epekto sa krisis

TAGBILARAN CITY Bohol (PIA)— Agi og pagplano sa unsay angayan nga buhaton sa Bohol niining nagpadayon nga kagubot sa Middle East nga nakaingon sa dakung pagkunhod sa pagbyahe, nagtapok ang mga kadagkuan sa turismo sa Bohol sa pagpanguna sa Aboitiz Infra Capital (AIC), ang tigdumala sa Bohol-Panglao International Airport (BPIA) Junyo 15.

Pagsabut sa suliran nga naka-apekto sa turismo ilabi na sa industriya sa hospitality, travel, ug aviation, ang panagtapok sa mga stakeholders didto sa IvyWall Resort sa Panglao nagbukas sa Strategic Tourism Dialog kabahin sa mga epekto sa lubay pa nga supply sa gasolina ug krudo, nagkamahal nga bili sa pagpadagans a negosyo, ug sa nagka-usab nga demands sa pagbyahe.

Kining mga nahisgutang factors, may daku og kalambigitan sa pagpadagan sa kompanya sa mga eroplano, pagpresyo sa mga pletehan, ug pagpadayag sa mga destinasyon nga maoy hangpon sa mga manuroyay ug turista, mao nga importante nga makahimo og hiniusa nga tubag ang Bohol alang niining mga hagit, segun sa mga nagpasiugda.

Matud pa ni BPIA General Manager Aldwin Uy, Ang turismo sa Bohol isip isla nga destinasyon, maoy dugo nga nagpabuhi sa ekonomiya ug kay dili man mapugngan ang mga panghitabo sa kalibutan, ang paghimo sa unsay anaa sa kakayahan sa mga Bol-anon sa pagpangandam sa mga hagit, pagpahiluna sa hinusang tubag ug pagseguro nga ang Bohol magpabiling kasaligan, makig-ambas ug iliwon nga anhi-onon sa mga byahedor, maoy labing importante karon.

Ang mga labing lig-on nga destinasyon, gitukod sa pakig-alayonay sa tanan, kapasidad nga mosagop sa gikinahanglan ug ang paggunit sa hiniusang panglantaw, dayag pa ni Uy.

Niining Strategic Tourism Dialogue, giaghat ang pagbaylo-ay sa mga kasayuran sa nagpanghitabo sa tourism market, binag-ong pamaagi sa pagpadagan sa negosyo, mga bag-ong uso sa pagbyahe samtang magtumbok usab sa mga stratehiya nga magpalig-on sa paglahutay sa turismo sa Bohol.

Kini usab nga mga tumong, mao ang dugukan sa Aboitiz InfraCapital Airports' ug sa iyang panaad nga palig-onon ang pagtinabangay sa tibuok tourism value chain ug pagmugna og lakang pagtubag sa mga hagit nga makaapekto sa ekonomiya sa rehiyon.

Didto sa dialogue ang mga tinugyanan sa Bohol Provincial Tourism Office, Bohol Provincial Tourism Council, Bohol Association of Resorts and Restaurants (BAHRR), Bohol Association of Travel and Tour Operators (BATTO), apil ang nga anaa sa negosyo sa eroplano ug ang hospitality stakeholders.

HINIUSANG PANGLANTAW. Sa pagpatawag sa tourism dialog, ang BPIA ug Aboitiz Infra Capital nga nagpadagan sa international airport nga apektado usab sa paghinay sa pagbyahe dala sa nagpadayong walay kasegurohan sa kagubot sa Middle East, nabukas ang hawanan para magkahiusa ang mga stakeholders dinhi aron magpadayon nga buhi ang turismo, bisag hinay ang travel industry. (PIABohol/AIC)