Tubag sa huwaw…

Pag-alima sa mga hayopan

pagpangandam sa huwaw

TAGBILARAN CITY Bohol (PIA)— Gawas sa pagpangandam pinaagi sa pagpananum diha sa mga tugkaran aron may makaon sa panahon sa tinghuwaw, apil sa sugyot sa mga nagbansay sa natural nga panguma ang pagpamuhi og mga hayupan.

Ang hayop nga gibuhi ug gialimahan, maghatag usab sa gikinahanglang abono sa yuta, ilabi na sa panahon nga mahal ang abono ug gilikayan ang inorganic nga abono, matud ni Reginaldo Balatayo, usa ka practictioner sa permaculture.

Ug aron magiyahan ang mga interesado niini, gipalig-on sa Agricultural Training Institute Regional Training Center 7 (ATI-RTC-7) ang pagpasanay sa livestock ug pagpa-ugmad sa maani sa mga umahan sa Bohol.

Usa ka bansaybansay sa Cattle Production and Management (Batch 2) ang gihimo gikan sa Hunyo 9-11, 2026, didto sa ATI-RTC 7 Training Hall sa Cabawan District, Tagbilaran City, subay niing katuyuan.

Ang tulo-ka-adlaw nga pagdugang sa kapasidad sa mga mag-uuma gitambongan sa 26 ka mga mag-uuma ug Agricultural Extension Workers (AEWs) nga maoy tigtabang usab sa mga mag-uuma sa kalungsuran sa ilang nga sulirang pangumahan.

Tumong sa bansaybansay ang pag-dugang sa kapasidad ug katakus sa mga partisipante sa praktikal nga panginahanglan sa pagpangbuhi og pagpasanay sa baka ug pagdumala niini subay sa malungtarong pagpasanay.

DIdto sa bansay gisayran sa mga mingtambong ang importante nga lugar sa karneng baka sa seguridad sa pagkaon, pagpangwarta ug ang suporta niini sa ekonomiya.

Gisayran usab didto ang nagkadaiyang lahi sa baka ug unsa ang labing maayo gikan nila: karnehon, gatasan, ug ikaabag sa pagdaro, aron matumbok usab sa mga-uuma unsa ang angay nga matang sa baka ang buhi-on, subay usab sa iyang sitwasyon.

Ang livestock production maoy labing sayun ug labing barato nga pamaagi nga mapun-an sa banay ang panginahanglan sa protina, samtang ang hayop makatabang sa pagpahiuli sa natandog na nga dagan sa kalibutan. (PIAbohol)

FORAGE GRASS. APil sa mga gikat-onan sa mga partisipante ang pag-andam sa mga ipakaon sa livestock, ang saktong sagol alang samas kompleto nga nutrisyon alang sa himsog ug daling mosanay nga mga buhi. (PIAbohol/ATI-RTC7)