132 ka wifi access points

Sa 141 ka lugar sa Bohol

TAGBILARAN CITY Bohol (PIA)— Sa ika napulo ka tuig nga pagkamugna sa Department of Information, Communications and Technology, lain nga 132 ka mga access points sa lain nga 60 ka lugar ang idugang aron mas mapalapad pa ang Free Wifi for all Program sa kagamhanan dinhi sa Bohol.

Kini maoy gibutyag ni Engr. Jimmy Ratilla, industry development bureau in charge sa DICT dinhi sa Bohol, didto sa Kapihan sa PIA.

Ang Free Wi-Fi for All usa ka programa sa DICT nga magtanyag sa libre nga internet access sa mga pangpubliko nga lugar sa tibuok nasud, ug nasukip na niini ang mga parke, plazas, hospitals, eskwelahan, transport terminals, mga munisipyo ug mga buhatan kagamhanan sa mga barangay.

Una na nga gitaho ni Ratilla, kinsa kuyog ni DICT Bohol Provincial Officer Victor Magallanes, nga human sa pagsugod sa pagpatuman sa flagship program subay sa Republic Act 10929 dinhi, may 362 na ka aktibo nga wireless fidelity (WiFI) access sites sa 141 ka mga lugar sa Bohol.

Gipasabut usab sa DICT nga dili magkatugma ang kadaghanon sa access points ug sa mga lokasyon, tungod kay may mga lugar dinhi sa Bohol nga gibutangan og mas daghang access points subay sa kadaghanon sa mga tawo nga makagamit niini.

Subay sa ngalan niini, ang wifi access libre alang sa tanan nga buot mogamit, apan kinahanglang usab nga tuyuan gyud sa mogamit sa pagkonek sa wifi-access point.

Ug sanglit kini nga wifi, iya man sa gobernor, aduna nay gipahimutang niini nga secured mga firewalls aron luwas usab ang mga mogamit sa hulga sa mga mangingilad nga nagyampungad diha sa internet.

Matud pa sa DICT, matag wifi access points, moabut sa 200 ka mga tawo nga ilang maserbisyohan, apan tungod usab sa mas segurado nga proseso nga dili makuha sa ubang mga tawo ang mga transaksyones diha gipaagi sa internet, ang panalipod niini nagkapahinay sa akses.

Hinuon, bisan pa niini, makatabang pa gihapon ang WIFI access points sa mga consumidor nga katonwala pay kasaligan nga akses gikan sa ilang mga panimalay. (PIAbohol)

NAGKALAPAD NGA AKSES SA KATAWHAN. Nagkadaghan na ang mga lugar sa Bohol nga mahimong may akses ang katawhan sa internet: kini dala sa balaod nga naghatag sa libre nga wifi sa mga katawhan, aron makakuha sa mas paspas ug mas kasaligan nga mga kasayuran alang sa maayong mga desisyon. ANg DICT maoy nagpatuman sa Free WIFI to All. (PIAbohol)