Bohol gipalapdan ang pagpangandam batok

sa El Niño atol sa 2nd full council meeting

TAGBILARAN CITY, Bohol (PIA)—Ang Provincial Disaster Risk Reduction and Management Council (PDRRMC) nipatawag sa ikaduhang full council meeting aron palapdan pa ang pagpangandam batok sa epekto sa El Niño sa Bohol niadtong Mayo 28, 2026, sa Ceremonial Hall sa Provincial Capitol syudad sa Tagbilaran.

Gipangunahan ni Provincial Administrator Asteria Caberte, ang mga representante gikan sa nasudnong mga ahensya sa gobyerno, mga opisina sa probinsiya, ug nag-unang stakeholders nagtigom aron hisgotan ang mga lakang sa pagpangandam sa kalamidad ug ang gipaabot nga epekto sa El Niño sa lalawigan sa Bohol.

Usa sa mga mahinungdanong diskusyon atol sa tigom mao ang weather outlook nga gipresentar ni Philippine Atmospheric, Geophysical and Astronomical Services Administration (PAGASA)-Bohol Head Leonard Samar diin iyang gitaho nga lagmit molambo ang El Niño sa dili madugay, nga adunay 82 porsyento nga posibilidad gikan sa Mayo hangtod Hulyo 2026, ug gilauman nga magpadayon hangtod sa sayong bahin sa 2027.

Gi-presentar ni Assistant Provincial Agriculturist Larry Pamugas ang kasamtangang kahimtang sa El Niño nga nakaapekto sa sektor sa agrikultura sa probinsiya diin iyang namatikdan nga ang grabeng kahimtang sa panahon, inubanan sa mga pagkabalda sa ekonomiya sa kalibotan, padayon nga nakaapekto sa mga lokal nga mag-uuma ug produksyon sa agrikultura.

Gitaho usab ni Pamugas nga ang probinsiya kasamtangang nagmintinar sa gibanabana nga imbentaryo sa bugas nga molungtad sulod sa 169 ka adlaw, makatabang sa pagsiguro sa seguridad sa pagkaon taliwala sa gipaabot nga ting-init.

Aron maminusan ang posibleng epekto sa El Niño, giaprobahan sa konseho ang rekomendasyon sa Office of the Provincial Agriculturist (OPA) aron suportahan ang cloud seeding operations isip kabahin sa mga lakang sa interbensyon sa probinsiya.

Samtang si Engr. Rico Bato-on sa National Irrigation Administration (NIA) nihatag og kalambuan sa kahimtang sa mga sistema sa irigasyon sa Bohol.

Sumala sa iyang report, gibanabana nga 59 porsyento sa mga lugar sa serbisyo sa irigasyon sa probinsya ang vulnerable sa epekto sa El Niño.

Si Meydallyn Paman, pangulo sa Office of the Provincial Veterinarian (OPV), nihisgot usab sa posibleng epekto sa dugay nga uga nga kondisyon sa produksyon sa kahayopan sa tibuok probinsya.

Ang representante sa Provincial Disaster Risk Reduction and Management Office (PDRRMO) nga si Rjee Gift Lim mi-presentar sa Enhanced Local Disaster Risk Reduction and Management Plan alang sa 2026–2031, nga gitumong sa pagpalig-on sa pagkaandam sa kalamidad sa probinsiya, mitigation, ug mga estratehiya sa pagtubag sa umaabot nga mga tuig.

Ang mga updates ug issuances gikan sa Department of the Interior and Local Government (DILG) gipresentar usab ni LGOO II Meah Hecell Nisnisan-Genovia diin iyang gipasiugda ang direktiba alang sa mga local government units nga magtukod og mga local task forces nga motutok sa kaandam ug pagtubag sa El Niño.

Gi-presentar usab sa PDRRMO ang mga update sa gisugyot nga pag-tap sa tinubdan sa kuryente sa mga CCTV system nga gitaod sa mga poste sa kuryente sa tibuok probinsya.

Samtang gi-presentar usab ni Provincial Health Officer Dr. Fruserma Uy ang mga health advisories kalabot sa grabeng kainit ug nitaho nga walay natalang namatay sa probinsiya nga nalambigit sa grabeng kainit sa panahon. (ECB/PIA7-Bohol)

Gipatawag sa Kagamhanan sa Probinsiya sa Bohol ang ikaduhang Full Council Meeting sa Provincial Disaster Risk Reduction and Management Council (PDRRMC) aron matubag ang mga dinalian nga kabalaka ug mga nag-ung-ong nga mga hagit nga nakaapekto karon sa probinsya niadtong Mayo 28, 2026, sa Ceremonial Hall sa Provincial Capitol, syudad sa Tagbilaran. (Provincial Government of Bohol photos)