Nat’l Heritage Month gitak-opan sa Bohol

pinaagi sa Grand Santacruzan 2026

TAGBILARAN CITY, Bohol (PIA)—Gitak-opan sa lalawigan sa Bohol ang kasaulogan sa National Heritage Month (NHM) 2026 pinaagi sa pagpahigayon sa Bohol Grand Santacruzan 2026, nga nagbag-o sa tradisyonal nga Flores de Mayo nga prosesyon ngadto sa usa ka buhi nga pasundayag sa pagtuo, kabilin ug pagkamamugnaon sa mga Boholano niadtong Mayo 30 sa Plaza Rizal, syudad sa Taagbilaran.

Ang kalihokan, gipasiugdahan sa Kagamhanan sa Probinsiya sa Bohol, pinaagi sa Bohol Center for Culture and Arts Development (BCCAD) ug Bohol Arts and Cultural Heritage (BACH) Council Fashion Design Committee.

Ang prosesyon adunay 33 ka Reyna ug mga escort sa couture ensembles nga inspirado sa biblical figures, Marian titles, ug Filipino heritage.

Ang mga lokal nga artists, tigdesinyo, estilista, artesano ug mga mamumuong pangkultura naghanduraw pag-usab sa kasiglohan na nga tradisyon sa Flores de Mayo, nga naghiusa sa relihiyosong pagtuo sa pagkamamugnaon.

Sa iyang pangbukas nga mensahe, ang BACH Council Fashion Design Committee Chairperson nga si Shanon Pamaong mihatag og gibug-aton sa kamahinungdanon sa pagpreserbar sa mga tradisyon sa mga Pilipino, ilabi na sa mga batan-on nga henerasyon.

Matud pa ni Pamaong nga ang kalihokan usa ka maayong ideya alang sa mga kabatan-onan, ilabi na sa Sagalas ug mga escort. Giingong kini nakagamot pag-ayo sa relihiyosong pagtuo sa mga Bol-anon, diin iya usab gipasiugda ang kamahinungdanon sa pagkonektar pag-usab sa kultura ug relihiyon nga mga tradisyon taliwala sa paspas nga pagbag-o sa modernong kalibotan.

Si Supervising Administrative Officer Metodio Maraguinot Jr. nipadangat sa mensahe ni Gobernador Erico Aristotle Aumentado ug mihatag og pasidungog sa dedikasyon sa mga Boholano nga artists, tigdesinyo, performer, organizer, ug komunidad.

Matud pa sa mensahe ni Aumentado nga pinaagi sa ilang kakugi, naningkamot ang kagamhanang probinsiya sa pagdasig sa tanan, ilabina na sa mga kabatan-onan, sa paghatag og bili sa atong kabilin, pagdawat sa pagkamamugnaon, ug pagpadayon sa pagpanalipod ug pagpreserbar sa dato nga kultural nga kabilin nga naghimo sa Bohol nga talagsaon gayud.

Sila Jaime V. Antonio Jr., Philippine Development Specialist for Culture and Arts sa National Commission for Culture and the Arts, ug BCCAD head Emerson Pinos mitambong usab sa maong kalihokan.

Sa wala pa ang main event, ang mga partisipante nagpahigayon og opisyal nga photoshoot sa Bellemar Panglao, nga nagpasiugda sa kaanindot sa mga costume ug sa kultural nga kahulogan sa selebrasyon. (ECB/PIA-7 Bohol)

Ang pagtuo, kultura, ug arte nahimong sentro sa entablado samtang ang kagamhanang probinsiyal sa Bohol nagpahigayon sa Bohol Grand Santacruzan 2026 niadtong Mayo 30, 2026, sa Plaza Rizal sa syudad sa Tagbilaran. Ang kalihokan nahimong kabahin sa tibuok probinsya nga pagsaulog sa National Heritage Month. (photo courtesy: Provincial government of Bohol)