DepEd nipahimangno sa publiko batok sa fund

collection scam nga tabang sa mga biktima sa linog

TAGBILARAN CITY, Bohol (PIA)—Gipahimangnoan sa Department of Education (DepEd) ang publiko batok sa dili awtorisado nga pagpangayo og pondo alang sa mga biktima sa linog sa Mindanao.

Sa usa ka advisory, ang DepEd niingon nga bakak ang nag-circulate nga suwat nga nangayo og pondo alang sa mga biktima sa linog gamit ang pangalan sa mga opisyal ug sa departamento sa edukasyon.

Ang peke nga sulat nag-ingon nga ang grupo nagplano nga makatigom og P10,000 matag pamilya sa mga biktima sa linog nga giingong maglakip sa emergency shelter materials, home repairs, essential food supplies, ug basic medical ug hygiene necessities, ug uban pa.

Gitambagan sa DepEd ang mga tawo nga magbinantayon ug susihon ang pagkalehitimo sa bisan unsang mga paningkamot sa pagkolekta aron masiguro nga ang mga donasyon maadto sa mga angay nga benepisyaryo.

Gi-awhag usab niini ang publiko nga magmatngon sa mga kadudahang mensahe, sulat, o online nga transaksyon.

Gipahinumdoman usab sa DepEd ang publiko nga mosunod lamang sa ilang mga opisyal nga social media accounts alang sa mga anunsyo ug impormasyon bahin sa batakang edukasyon. (ECB/PIA-7 Bohol)

Way kamatuoran ang nikatap nga suwat nga nangayo o nangolekta og pondo alang sa mga biktima sa linog gamit ang pangalan sa mga opisyal ug sa Department of Education. Gitambagan ang publiko nga magmabinantayon kalabot sa mga kadudahang mensahe, sulat, o online nga transaksyon. (DepEd/PIA-7 Bohol)