DHSUD gilugwayan ang HOA

re-registration hangtod Disyembre

TAGBILARAN CITY, Bohol (PIA)—Gimando sa Department of Human Settlements and Urban Development (DHSUD) ang paglugway sa deadline sa re-registration sa homeowners’ associations (HOAs), nga narehistro kaniadto sa Securities and Exchange Commission (SEC) ug Home Insurance Guarantee Corporation (HIGC), hangtod sa Disyembre 18, 2026.

Gilagdaan ni DHSUD Kalihim Jose Ramon Aliling ang Department Order 2026 -007 series of 2026, nga naghatag og unom ka bulan nga extension gikan sa Hunyo 18, 2026 nga deadline alang sa mga giila nga HOA.

Matud pa ni Aliling nga ang mga dagkong opisyal ug ang Homeowners Association and Community Development Bureau (HOACDB) mirekomendar sa panginahanglan sa extension human sa lawom nga assessment ug konsultasyon sa mga stakeholders.

Si Aliling nagkanayon nga gibase ang maong lakang sa mga konsultasyon ug online nga feedback gikan sa ilang mga stakeholders diin human sa mabinantayon nga ebalwasyon, ilang nahimo ang maong desisyon aron masiguro nga ang tanan nga HOA marehistro ubos sa DHSUD.

Ubos sa Section 4 sa Republic Act 9904 o ang Magna Carta for Homeowners and Homeowners Association, ang tanang subdivision ug government housing HOAs, apil na ang rehistrado sa SEC ug HIGC, gikinahanglan nga magparehistro pag-usab sa DHSUD, kanhi Housing and Land Use Regulatory Board (HLURB).

Subay sa Section 32 sa Revised Implementing Rules and Regulations (IRR) sa RA 9904, ang rehistrasyon sa mga asosasyon sa tag-iya sa balay nga napakyas sa pagtuman sa re-registration requirement sa Hunyo 18, 2025, awtomatik nga masuspinde.

Ang mga gisuspinde nga HOA ug ilang mga miyembro mahimong dili na mopatuman sa ilang mga katungod ug gahum nga gipahayag ubos sa Republic Act 9904 ug ang 2024 nga revised IRR niini, paghangyo og tabang gikan sa DHSUD alang sa mga reklamo ug panagbangi, ug pagpasaka og reklamo sa Human Settlements Adjudication Commission.

Ang mga HOA nga narehistro ubos sa HLURB ug condominium nga mga korporasyon wala iapil niini nga mando.

Gipahinumdoman sa DHSUD ang tanang HOA nga i-proseso ang re-rehistro sa labing sayo nga panahon ug dili maghulat sa deadline aron malikayan ang mas taas nga oras sa pagproseso. (ECB/PIA-7 Bohol)

Gimando sa Department of Human Settlements and Urban Development nga lugwayan ang deadline alang sa re-registration sa homeowners’ associations, nga narehistro kaniadto sa Securities and Exchange Commission ug Home Insurance Guarantee Corporation, hangtod sa Disyembre 18, 2026. (DHSUD)