DICT Bohol nagtanyag sa libre nga

bansay sa office productivity tools

TAGBILARAN CITY Bohol (PIA)— Nagkamalisud ka ba sa imong trabaho isip opisyal sa barangay tungod kay wala kay kabang-kaagan sa paggamit sa computer ug sa mga programa nga magamit pagpasayon sa imong trabaho?

Nan, aghata ang imong barangay nga maka-organisa og pundok alang sa pagbansaybansay nga mahimong makuha gikan sa Department of Information Communication and Technology (DICT) subay sa ilang Literacy and Competency Development Bureau dinhi sa Tagbilaran City.

Isip maoy training arm sa DICT, anaa sa ilang mga andam nga mga bansaybansay ang nagkadaiyang information communication ug technology programs aron kagamhan ang mga katawhan sa katakus ig digital nga kahibaw isip himan-kapanginabuhian, matud ni Jaymar Masibay, didto sa Kapihan sa PIA.

Unod sa ilang digital literacy program ang office productivity tools sama sa computer literacy training kabahin sa Microsoft Word, Ms Excel, Ms Powerpoint: nga gikinahanglang katakus alang sa word processing sa mga himoong dokumento ug mga reports nga gikan sa barangay.

Gawas pa niini, alang sa mga senior citizens kinsa nanginahanglan nga makat-on sa fundamentals sa computer aron makabukas bukas og kaugalingon nga email accounts alang sa social benefits, ngadto sa mga estudyante nga buot mahimong hanas sa canva alang sa school reports, posters, ngadto sa paggamit sa google suite alang sa mas organisadong kinabuhi, kini anaa sa DICT.

Gani, ang DICT aduna usabkurso alang sa mga gagmay nga mamumuhunan kinsa nanginahanglan nga makit-an sa online ang ilang mga produkto.

Ang Artificial Intelligence Integration alang sa negosyo, makatabang sa pagpadali, pagpapaspas ug pagpalapad sa presensya sa negosyo, dugang ni Masibay.

Alang sa mga interesado nga makakuha sa nahisgutan nga mga libreng bansaybansay, pakigsabut sa DICT bohol nga anaa sa ibabaw sa LTO Tagbilaran o pangitaa ang DICT 7 regional account sa facebook aron makapahiluna sa hangyo, matud ni Victor Magallanes, DICT Bohol field Office chief. (PIAbohol)

SA IKA 10 TUIG. Libreng mga bansaybansay alang sa mga buot makat-on sa office productivity tools sama sa word processing, Microsoft excel, Microsoft Powerpoint, canva, computer fundamentals ang tanyag sa DICT alang s amga Bol-anong buot makasakay sa mga katakus nga gikinahanglan sa panahon. (PIAbohol)