DMW subling nipasidaan batok sa peke nga trabaho

sa gawas sa nasud nga gitanyag sa social media

TAGBILARAN CITY, Bohol (PIA)—Subling nipasidan-an ang Department of Migrant Workers (DMW) sa publiko batok sa mga tanyag nga peke nga trabaho sa gawas sa nasud nga mikaylap sa social media.

Sa usa ka advisory, gi-awhag sa DMW ang mga aplikante nga magmatngon sa mga recruitment posts nga nagsaad sa dali nga pagbiya, daku nga sweldo, ug dali nga proseso baylo sa dagkong bayad.

Si Migrant Workers Kalihim Hans Leo J. Cacdac nipahinumdom sa publiko nga ang pagbaton og opisina, social media page, o mga langyaw sulod sa usa ka grupo dili igo aron moangkon nga kini legal nga recruitment agency.

Matud pa ni Cacdac nga ang mga aplikante kinahanglang magsiguro nga ang recruiter lisensyado sa DMW, ang mga personnel niini rehistrado, ug ang recruiter moproseso og working visa ug dili tourist visa.

Sa samang paagi, gitambagan sa departamento ang publiko nga susihon kanunay ang mga dokumento, kontrata, ug bayad, ug kanunay nga mangayo og opisyal nga resibo sa matag transaksyon.

Ang bisan unsang kadudahang recruitment activities mahimong i-report sa DMW Anti-Illegal Recruitment ug DMW AIRTIP Facebook pages, pinaagi sa mga numero sa telepono sa departamento nga 8722-1144 ug 8722-1155, o email sa [mwpb@dmw.gov.ph](mailto:mwpb.ph@dmw. [airtipinfo@dmw.gov.ph](mailto:airtipinfo@dmw.gov.ph).

Alang sa dugang nga mga update, ang publiko gitambagan nga mobisita sa DMW Facebook page https://www.facebook.com/dmwphl. (ECB/PIA-7 Bohol)

Gipasidan-an sa Department of Migrant Workers ang publiko batok sa mga pekeng “work abroad” nga tanyag nga gipakatap sa social media. (DMW)